മല്ലപ്പള്ളി : പത്തനംതിട്ട എക്സൈസ് സ്പെഷ്യൽ സ്ക്വാഡ് നടത്തിയ പരിശോധനയില് യുവാവിനെ എം.ഡി.എം.എ യുമായി പിടികൂടി. മല്ലപ്പള്ളി കൊറ്റനാട് പീടികയിൽ വീട്ടിൽ തോമസ് മാത്യുവിന്റെ മകൻ സ്റ്റാൻലി തോമസ് മാത്യു (കൊറിയർ സ്റ്റാൻലി -31) ആണ് പിടിയിലായത്. എക്സൈസ് സംഘത്തിന് ലഭിച്ച രഹസ്യ വിവരത്തിന്റെ അടിസ്ഥാനത്തില് ഇയാളുടെ വീട്ടില് നടത്തിയ പരിശോധനയില് യുവാവിന്റെ കിടപ്പ് മുറിയില് നിന്നുമാണ് എം.ഡി.എം.എ പിടിച്ചെടുത്തത്. കഴിഞ്ഞ രാത്രിയിലാണ് സംഘം പരിശോധന നടത്തിയത്.
ഇയാള് സ്ഥിരമായി എം.ഡി.എം.എ ഉപയോഗിക്കുകയും വില്പന നടത്തുകയും ചെയ്യുന്നതായി യുവാവിനെ ചോദ്യം ചെയ്തതില് നിന്നും എക്സൈസ് സംഘത്തിന് ബോധ്യപ്പെട്ടിട്ടുണ്ട്. പത്തനംതിട്ട എക്സൈസ് സ്പെഷ്യൽ സ്ക്വാഡ് സർക്കിൾ ഇൻസ്പെക്ടർ എം.ഒ വിനോദിന്റെ നേതൃത്വത്തില് നടന്ന പരിശോധനയില് അസിസ്റ്റന്റ് എക്സൈസ് ഇൻസ്പെക്ടർ എസ്.ജയകുമാർ, സിവിൽ എക്സൈസ് ഓഫീസർ ജിതിൻ എൻ., നിതിൻ ശ്രീകുമാർ, കൃഷ്ണകുമാർ എം.എസ്, സോജൻ എച്ച്., വിഷ്ണു വി., വനിതാ സിവിൽ എക്സൈസ് ഓഫീസർ ഭാഗ്യലക്ഷ്മി എന്നിവർ പങ്കെടുത്തു.
