കാക്കനാട്: കാർ നിയന്ത്രണം വിട്ട് വൈദ്യുതിപോസ്റ്റിൽ ഇടിച്ചുണ്ടായ അപകടത്തിൽ യുവാവ് മരിച്ചു. ഇൻഫോപാർക്ക് റോഡിലായിരുന്നു അപകടം. തൃശൂർ ശാന്തിനഗർ സ്വദേശി ദേവാലയത്തിൽ ദേവാനന്ദ് കുഞ്ഞുമോൻ (27) ആണ് മരിച്ചത്. അപകടത്തിൽ കാറിലുണ്ടായിരുന്ന മറ്റ് രണ്ട് പേർക്ക് ഗുരുതരമായി പരിക്കേറ്റു. ചൊവ്വാഴ്ച പുലർച്ചെ 2.30 ഓടെയാണ് അപകടം. നിയന്ത്രണം വിട്ട കാർ റോഡരികിലെ വൈദ്യുതിപോസ്റ്റിൽ ശക്തമായി ഇടിക്കുകയായിരുന്നു. ഇടിയുടെ ആഘാതത്തിൽ വാഹനം തകർന്ന നിലയിലായിരുന്നു. രാത്രി ഷട്ടിൽ കളികഴിഞ്ഞ് മടങ്ങുന്നതിനിടെയാണ് അപകടമുണ്ടായത്. വൈദ്യുതിപോസ്റ്റില് കാർ ഇടിച്ചതിന് പിന്നാലെ വാഹനത്തിൽ ഉണ്ടായിരുന്നവർ പുറത്തേക്ക് തെറിച്ച് വീഴുകയായിരുന്നു.
കാക്കനാട് സൺറൈസ് ആശുപത്രിയിലെത്തിച്ചെങ്കിലും തലയ്ക്ക് ഗുരുതരമായി പരിക്കേറ്റ ദേവനാന്ദിന്റെ ജീവൻ രക്ഷിക്കായില്ല. അപകടവിവരം ലഭിച്ചതിനെ തുടർന്ന് നാട്ടുകാരും പോലീസും അഗ്നിരക്ഷാസേനയും സ്ഥലത്തെത്തി രക്ഷാപ്രവർത്തനം നടത്തി. മറ്റ് രണ്ട് പേരും ഗുരുതര പരിക്കുകളോടെ ചികിത്സയിലാണ്. സംഭവത്തിൽ ഇൻഫോപാർക്ക് പോലീസ് കേസെടുത്ത് അന്വേഷണം ആരംഭിച്ചു.
