പാലാ : പാലായിലെ സൈബര് കുറ്റവാളിക്കെതിരെ കേസെടുത്തതില് പ്രതിഷേധിച്ച് തിരുവോണദിവസം മാണി സി കാപ്പന് നടത്തുന്ന ഉണ്ണാവ്രത സമരത്തിനെതിരെ കേരള കോണ്ഗ്രസ് യുവജനവിഭാഗമായ യുത്ത് ഫ്രണ്ട് എം പ്രവര്ത്തകരും രംഗത്ത്. മാണി സി കാപ്പന്റെ ഉണ്ണാവ്രത സമരം നടക്കുന്ന അതേ സമയത്തുതന്നെ പാലാ ഗവണ്മെന്റ് ആശുപത്രി പടിക്കല് എം.എല്.എയ്ക്ക് സല്ബുദ്ധി തോന്നാന്വേണ്ടി യുത്ത് ഫ്രണ്ട് എം പ്രവര്ത്തകര് മുട്ടില് നിന്ന് പ്രാര്ത്ഥന നടത്തും. രാവിലെ പ്രഭാത ഭക്ഷണത്തിനു ശേഷം ആരംഭിച്ച് ഉച്ചയൂണിന് മുന്പ് അവസാനിക്കുന്ന കാപ്പന്റെ ഉണ്ണാവ്രത സമരത്തെ പരിഹസിച്ചുകൊണ്ടാണ് യൂത്ത് ഫ്രണ്ടിന്റെ സമരം.
കുറ്റവാളികളെ നിയമത്തിനു മുന്പില് കൊണ്ടുവരുന്നതിന് പകരം അവരെ സംരക്ഷിക്കുവാനുള്ള നീക്കമാണ് എംഎല്എ നടത്തുന്നത്. പ്രഭാത ഭക്ഷണത്തിനു ശേഷം ആരംഭിച്ച് ഉച്ച ഭക്ഷണ സമയത്ത് അവസാനിക്കുന്ന ഉപവാസ സമരം കേരള ചരിത്രത്തില് ആദ്യത്തേതായിരിക്കും എന്നും യൂത്ത് ഫ്രണ്ട് നേതാക്കള് പറഞ്ഞു. ഇന്ന് രാവിലെ 9 മണിക്ക് പാലാ ഗവണ്മെന്റ് ആശുപത്രി ജംഗ്ഷനില് നടത്തുന്ന പ്രാര്ത്ഥന യജ്ഞം അഡ്വക്കേറ്റ് സെബാസ്റ്റ്യന് കുളത്തുങ്കല് എം.എല്.എ ഉദ്ഘടാനം നിര്വഹിക്കും. യൂത്ത് ഫ്രണ്ട് ടൗണ് മണ്ഡലം പ്രസിഡന്റ് ദേവന് കളത്തിപ്പറമ്പില് അധ്യക്ഷത വഹിക്കും.