മലപ്പുറം: കരിപ്പൂർ വിമാനത്താവളത്തിൽ നിന്നുള്ള ഹജ്ജ് യാത്ര വിമാന നിരക്ക് സംബന്ധിച്ച് നിരുത്തരവാദിത്വപൂർണമായ മറുപടിക്കെതിരെ വിമാനം പറഞ്ഞി പ്രതിഷേധം. യൂത്ത് ലീഗ് മലപ്പുറം നിയോജക മണ്ഡലം കമ്മിറ്റിയാണ് ബലൂൺ വിമാനങ്ങൾ പറത്തി പ്രതിഷേധിച്ചത്. മുസ്ലിം ലീഗ് ജില്ലാ വൈസ് പ്രസിഡന്റ് ഇസ്മാഈൽ മുത്തേടം സമരം ഉദ്ഘാടനം നിർവഹിച്ചു. ഹജ്ജ് വിമാന നിരക്ക് സംബന്ധിച്ച് ഇടപെടാനാകില്ലെന്നും മീഡിയവൺ വിമാനം കൊണ്ടുവന്നാൽ കുറഞ്ഞ നിരക്കിൽ സർവ്വീസ് നടത്താമെന്നുമാണ് എ.പി അബ്ദുല്ലക്കുട്ടി പറഞ്ഞത്.
വിമാന ടിക്കറ്റ് നിരക്ക് കുത്തനെ കൂട്ടിയതോടെ കരിപ്പൂരിൽനിന്നും ഹജ്ജിന് പോകേണ്ട തീർഥാടകർ ആശങ്കയിലാണ്. കേരളത്തിലെ മറ്റു വിമാനത്താവളങ്ങളിൽ നിന്ന് 85,000 രൂപ നിരക്കിൽ ഹജ്ജ് യാത്ര സാധ്യമാകുമ്പോൾ കരിപ്പൂരിലത് 1,65,000 രൂപയാണ്. കരിപ്പൂർ വിമാനത്താവളത്തെയാണ് കേരളത്തിൽ നിന്നുള്ള ഏറ്റവും കൂടുതൽ ഹജ്ജ് തീർഥാടകർ ആശ്രയിച്ചു കൊണ്ടിരിക്കുന്നത്.
