കൊച്ചി: നെടുമ്പാശ്ശേരിയിൽ പോലീസുകാരനെ ആക്രമിച്ച സംഭവത്തിൽ മൂന്ന് യുവാക്കൾക്കെതിരെ കേസ്. ബൈക്കിൽ ഇവർ സഞ്ചരിച്ചതിന്റെ ചിത്രം മൊബൈൽ ഫോണിൽ പകർത്തിയതിലുള്ള ദേഷ്യമാണ് ആക്രമണത്തിൽ കലാശിച്ചത്. മുഖ്യമന്ത്രിയുടെ സുരക്ഷാ ക്രമീകരണങ്ങളുടെ ഭാഗമായി ഡ്യൂട്ടിയിലുണ്ടായിരുന്ന പോലീസുകാരനെയാണ് യുവാക്കൾ മർദിച്ചത്. ആക്രമണത്തിനിടെ പൊലീസുകാരന്റെ നെഞ്ചിൽ ചവിട്ടിയതായും പരാതിയുണ്ട്. കപ്രശ്ശേരി സ്വദേശികളായ ശ്യാം, റെനീഷ്, അഖിൽ എന്നിവർക്കെതിരെയാണ് നെടുമ്പാശ്ശേരി പോലീസ് കേസ് രജിസ്റ്റർ ചെയ്തത്. ഇന്നലെ രാത്രി ഏഴ് മണിയോടെയായിരുന്നു സംഭവം.
മുഖ്യമന്ത്രിയുടെ സന്ദർശനവുമായി ബന്ധപ്പെട്ട സുരക്ഷാ ഡ്യൂട്ടിക്കിടെ പ്രദേശത്ത് നിരീക്ഷണം നടത്തുകയായിരുന്ന പോലീസ് ഉദ്യോഗസ്ഥൻ ഒരേ ബൈക്കിൽ മൂന്ന് പേർ സഞ്ചരിക്കുന്നത് ശ്രദ്ധയിൽപ്പെട്ടതിനെ തുടർന്ന് തെളിവിനായി ചിത്രം പകർത്തുകയായിരുന്നു. ഇത് ചോദ്യം ചെയ്ത് യുവാക്കൾ പോലീസുകാരനുമായി വാക്കേറ്റത്തിൽ ഏർപ്പെടുകയും തുടർന്ന് കൈയേറ്റം നടത്തുകയുമായിരുന്നുവെന്നാണ് പരാതി. ആക്രമണത്തിനിടെ പോലീസുകാരന്റെ നെഞ്ചിൽ ചവിട്ടുകയും ഡ്യൂട്ടി തടസ്സപ്പെടുത്താൻ ശ്രമിക്കുകയും ചെയ്തതായി പോലീസ് അറിയിച്ചു. സംഭവത്തിൽ കൂടുതൽ അന്വേഷണം തുടരുകയാണ്.
