പാട്ന: ബിഹാര് സ്വദേശികളായ തൊഴിലാളികള് ആക്രമിക്കപ്പെട്ടെന്ന് കാണിക്കുന്ന വ്യാജ വീഡിയോ തയ്യാറാക്കിയ യൂട്യൂബര് അറസ്റ്റില്. തമിഴ്നാട്ടില് ബിഹാര് സ്വദേശികളായ തൊഴിലാളികള് ആക്രമിക്കപ്പെട്ടെന്ന് കാണിക്കുന്ന വ്യാജ വീഡിയോ ആണിയാള് തയ്യാറാക്കിയത്. ബിഹാര് സ്വദേശി മനീഷ് കശ്യപ് എന്ന യൂട്യൂബറാണ് പിടിയിലായിരിക്കുന്നത്. കേസിലെ മൂന്നാമത്തെ അറസ്റ്റാണിത്. പടിഞ്ഞാറന് ചമ്പാരന് ജില്ലയിലെ ബേട്ടിയയിലെ ജഗദീഷ്പൂര് പോലീസാണ് കശ്യപിനെ അറസ്റ്റ് ചെയ്തത്.
തമിഴ്നാട്ടില് ജോലി ചെയ്യുന്ന ബിഹാര് നിവാസികളെ കുറിച്ച് തെറ്റായതും തെറ്റിദ്ധരിപ്പിക്കുന്നതുമായ വീഡിയോകള് പ്രചരിപ്പിച്ചെന്നാണ് ഇയാള്ക്കെതിരെയുള്ള ആരോപണം. നേരത്തെ സാമ്പത്തിക ക്രമക്കേടുകള് കണ്ടെത്തിയതിനെ തുടര്ന്ന് മനീഷിന്റെ ബാങ്ക് അക്കൗണ്ട് പോലീസ് മരവിപ്പിച്ചിരുന്നു. ഔദ്യോഗിക ട്വിറ്റര് ഹാന്ഡില് വഴി തെറ്റിദ്ധരിപ്പിക്കുന്ന വിവരങ്ങള് പ്രചരിപ്പിച്ചതിനും പോലീസ് ഇയാള്ക്കെതിരെ കേസെടുത്തിരുന്നു. കേസുമായി ബന്ധപ്പെട്ട് മാര്ച്ച് 6 ന് ആദ്യ എഫ്ഐആര് രജിസ്റ്റര് ചെയ്യുകയും കശ്യപ് ഉള്പ്പെടെ നാല് പേര്ക്കെതിരെ കേസെടുക്കുകയും ചെയ്തിരുന്നു.
