വയനാട് : സിക്ക വൈറസ് വ്യാപനം റിപ്പോര്ട്ട് ചെയ്ത സാഹചര്യത്തില് മുന്കരുതല് സ്വീകരിക്കണമെന്ന് വയനാട് ജില്ല ഡി.എം.ഒ ഡോ. ആര്. രേണുക അറിയിച്ചു. സാധാരണ രീതിയില് വളരെ ലഘുവായ രീതിയില് വന്നുപോവുന്ന ഒരു വൈറസ് രോഗമാണിത്. പ്രധാനമായും ഈഡിസ് കൊതുകുകള് വഴിയാണ് രോഗം ഉണ്ടാകുന്നത്. രാവിലെയും വൈകിട്ടുമാണ് ഇത്തരം കൊതുകുകള് സാധാരണ മനുഷ്യനെ കടിക്കുന്നത്. ലൈംഗിക ബന്ധത്തിലൂടെയും രോഗബാധിതരായ ഗര്ഭിണിയില്നിന്ന് കുഞ്ഞിലേക്കും അസുഖം പകരാന് സാധ്യതയുണ്ട്. ഗര്ഭിണികളില് വളര്ച്ചയെത്താതെയുള്ള പ്രസവം, അബോര്ഷന് എന്നിവക്ക് സാധ്യതയുണ്ട്.
നേരിയ പനി, ശരീരത്തില് ചുവന്ന പാടുകള്, ചെങ്കണ്ണ്, സന്ധിവേദന, പേശിവേദന എന്നിവയാണ് പ്രധാന ലക്ഷണങ്ങള്. എങ്കിലും 80 ശതമാനം രോഗികളിലും ശ്രദ്ധേയമായ ലക്ഷണങ്ങള് ഉണ്ടാവാറില്ല. സിക്ക വൈറസിനെ നശിപ്പിക്കുന്ന ഫലപ്രദമായ ആന്റി വൈറസ് മരുന്നുകളോ ഇതിനെതിരെയുള്ള വാക്സിനുകളോ നിലവില് വികസിപ്പിച്ചിട്ടില്ല. ആയതിനാല് രാവിലെയും വൈകിട്ടും രോഗം പരത്തുന്ന ഈഡിസ് കൊതുകുകള് പുറത്തിറങ്ങുന്നതിനാല് കടിയേല്ക്കാതെ ശ്രദ്ധിക്കണമെന്നും മെഡിക്കല് ഓഫീസര് ഡോ.ആര് രേണുക അറിയിച്ചു.
