മഹാരാഷ്ട്രയില്‍ 10 മന്ത്രിമാര്‍ക്കും 20 എംഎല്‍എമാര്‍ക്കും കൊവിഡ്

മുംബൈ : മഹാരാഷ്ട്രയില്‍ ഒമിക്രോണ്‍ കാരണം കോവിഡ് കേസുകള്‍ വന്‍തോതില്‍ വര്‍ധിക്കുന്നു. പത്തോളം മന്ത്രിമാര്‍ക്ക് കോവിഡ് പോസിറ്റീവായിരിക്കുകയാണ്. ഇക്കാര്യം ഉപമുഖ്യമന്ത്രി അജിത് പവാറാണ് അറിയിച്ചത്. ഇരുപതോളം എംഎല്‍എമാര്‍ക്കും കോവിഡ് സ്ഥിരീകരിച്ചിട്ടുണ്ട്. അതേസമയം സഭാ പ്രവര്‍ത്തനങ്ങള്‍ അടക്കം ഇതോടെ താളം തെറ്റുമെന്ന് ഉറപ്പായി. മുഖ്യമന്ത്രി ഉദ്ധവ് താക്കറെയും സര്‍ജറി കഴിഞ്ഞ് വിശ്രമത്തിലാണ്. കഴിഞ്ഞ ദിവസം കോവിഡ് അവലോകന യോഗത്തില്‍ ഉദ്ധവ് പങ്കെടുത്തിരുന്നു. കോവിഡ് കേസുകകളും ഇനിയും ഉയര്‍ന്ന് കൊണ്ടിരിക്കുകയാണെങ്കില്‍ തീര്‍ച്ചയായും കടുത്ത നിയന്ത്രണങ്ങള്‍ സംസ്ഥാനത്ത് കൊണ്ടുവരേണ്ടി വരുമെന്ന് അജിത് പവാര്‍ അറിയിച്ചു. നേരത്തെ ലോക്ഡൗണില്ലെന്നു പ്രഖ്യാപിച്ച മഹാരാഷ്ട്ര നിയന്ത്രണങ്ങള്‍ വീണ്ടും കടുപ്പിക്കുമെന്ന സൂചനയാണ് നല്‍കുന്നത്.