കോന്നി : കോന്നി ഗ്രാമപഞ്ചായത്തിലെ കുടുംബശ്രീയുടെ ആഭിമുഖ്യത്തിൽ എന്.ആര്.എല്.എം – എഫ്.എന്.എച്ച്.ഡബ്ല്യു പദ്ധതിയുടെ ഭാഗമായി 100 ദിന ക്ഷയരോഗമുക്ത ക്യാമ്പയിന് ഗ്രാമപഞ്ചായത്ത് കമ്മ്യൂണിറ്റി ഹാളിൽ നടന്ന ചടങ്ങില് പ്രസിഡന്റ് റോജി ഏബ്രഹാം ഉദ്ഘാടനം ചെയ്തു. പഞ്ചായത്തിനെ ക്ഷയരോഗമുക്ത പഞ്ചായത്ത് ആക്കി മാറ്റുന്നതിനായി സി.ഡി.എസ് മെമ്പർമാർക്കും കുടുംബശ്രീ അംഗങ്ങൾക്കും ബോധവത്കരണ ക്ലാസ് നടത്തി. ക്ഷയരോഗത്തെ ഭയം കൂടാതെ അഭിമുഖീകരിക്കുന്നതിനും വരാതിരിക്കുന്നതിനും ശ്രദ്ധിക്കേണ്ട കാര്യങ്ങളെക്കുറിച്ച് ജൂനിയർ ഹെൽത്ത് ഇൻസ്പെക്ടർ ബിന്ദു ക്ലാസ് നയിച്ചു.
കോന്നി ഗ്രാമപഞ്ചായത്തിലെ റിപ്പോർട്ട് ചെയ്യപ്പെട്ട ക്ഷയരോഗികൾക്ക് വാർഷിക പദ്ധതിയിൽ ഉൾപ്പെടുത്തി പോഷകാഹാര കിറ്റ് വിതരണം ചെയ്യുന്നുണ്ടെന്ന് ഗ്രാമപഞ്ചായത്ത് പ്രസിഡന്റ് അറിയിച്ചു. യോഗത്തിൽ ക്ഷേമകാര്യ സ്റ്റാൻറിംഗ് കമ്മറ്റി ചെയർമാൻ അജി കൊച്ചു കുഞ്ഞ്, വാർഡ് മെമ്പർമാരായ കെ.പി ശിവദാസ്, ഇന്ദുകല വി, ശ്യാംകുമാർ പി. എസ്, ജിൽഷ ഷാജി, സൂര്യകല ആർ, അസിസ്റ്റന്റ് സെക്രട്ടറി സജിനിമോൾ എസ് എന്നിവർ പങ്കെടുത്തു. സി.ഡി.എസ് വൈസ് ചെയർപേഴ്സൺ റീന യോഗത്തിന് നന്ദി രേഖപ്പെടുത്തി.
