തിരുവനന്തപുരം : കോവിഡ് രോഗികളുടെ എണ്ണം വർധിക്കുന്ന സാഹചര്യത്തിൽ ഓക്സിജൻ ലഭ്യതയ്ക്കു തടസമുണ്ടാകാതിരിക്കാൻ നടപടി സ്വീകരിക്കണമെന്ന് ആവശ്യപ്പെട്ട് മുഖ്യമന്ത്രി പിണറായി വിജയൻ പ്രധാനമന്ത്രി നരേന്ദ്ര മോദിക്കു കത്തയച്ചു. കേരളത്തിൽ ലിക്വിഡ് ഓക്സിജന്റെ ആവശ്യം വർധിക്കുകയാണെന്നു അദ്ദേഹം കത്തിൽ ചൂണ്ടിക്കാട്ടി. ഈ സാഹചര്യത്തിൽ ഓക്സിജൻ സംഭരണം വർധിപ്പിക്കണം. ഇതിനായി 1000 ടൺ ലിക്വിഡ് മെഡിക്കൽ ഓക്സിജൻ ആവശ്യമാണ്.
വിഷയത്തിൽ നടപടി സ്വീകരിക്കാൻ വിദേശകാര്യ മന്ത്രാലയത്തിനു നിർദേശം നൽകണം. ഇതിനു പുറമേ മുൻഗണനാക്രമത്തിൽ ആവശ്യത്തിനു ടാങ്കറുകളും പിഎസ്എ പ്ലാന്റുകളും ഓക്സിജൻ കോൺസെൻട്രേറ്റേഴ്സും വെന്റിലേറ്ററുകളും അനുവദിക്കണമെന്നും അദ്ദേഹം അഭ്യർഥിച്ചു. 50 ലക്ഷം ഡോസ് കോവിഷീൽഡും 25 ലക്ഷം ഡോസ് കോവാക്സീനും നൽകണമെന്നും മുഖ്യമന്ത്രി കത്തിൽ ആവശ്യപ്പെട്ടു.
