റാന്നി: എണ്ണൂറാംവയലിലെത്തുന്നവർ ആദ്യം ചോദിക്കുന്ന ചോദ്യമാണ് എവിടെയാണ് വയൽ എന്നത്. ചോദ്യം കേട്ടു മടുത്ത കുട്ടിക്കൂട്ടം വയലൊരുക്കാൻ തീരുമാനിച്ചു ഇറങ്ങിയപ്പോൾ എണ്ണൂറാം വയൽ സി എം എസ് എൽ പി സ്കൂളിന്റെ മുറ്റത്ത് മനോഹരമായ വയല് രൂപപെട്ടു. നെൽ വയൽ കതിരണിഞ്ഞു നിൽക്കുന്ന കാഴ്ച ആരെയും ആകർഷിക്കും. വിത്ത് വിതയ്ക്കലും ഞാറു നടലും കള പറിക്കലും വളമിടലുമൊക്കെ ആഘോഷമാക്കി മഹത്തായ കാർഷിക സംസ്കാരത്തെ അടുത്തറിയുകയായിരുന്നു കുട്ടികൾ. ഉമ ഇനത്തിൽപ്പെട്ട നെൽവിത്താണ് കുട്ടികൾ കൃഷിക്കായി തെരെഞ്ഞെടുത്തത്. ജൈവകൃഷി രീതിയാണ് പൂർണ്ണമായും അവലംബിച്ചത്. അധ്യാപകരായ ഷെൽബി ഷാജി, എൻ ഹരികൃഷ്ണൻ, മെർലിൻ മോസസ്, അഖിൽമോൻ ഷാജി എന്നിവരുടെ നേതൃത്വത്തിൽ സ്കൂളിലെ കാർഷിക ക്ലബ്ബിലെ പ്രവർത്തകരാണ് വയലൊരുക്കി പരിചരിച്ചു വരുന്നത്.
കൊയ്ത്ത് ആഘോഷ പൂർവമായി നടത്താനുള്ള ഒരുക്കത്തിലാണ് എണ്ണൂറാം വയൽ സി എം എസ് എൽ പി സ്കൂളിലെ കുട്ടിക്കർഷകർ. മിഷ്നറിമാർ തങ്ങളുടെ പ്രവർത്തന മേഖലകളെ മിഷൻ ഫീൽഡുകൾ എന്ന് രേഖപ്പെടുത്തിയത് മലയാളീകരിച്ചപ്പോളാണ് വയൽ പ്രദേശമെന്നായി മാറിയത്. പ്രദേശം ചർച്ച് മിഷനറി സൊസൈറ്റിയുടെ ഇന്ത്യയിലെ എണ്ണൂറാമത്തെ മിഷൻ ഫീൽഡ് ( വയൽ പ്രദേശം ) ആയി പ്രഖ്യാപിച്ചിരുന്നു. അങ്ങനെയാണ് സ്കൂളും സമീപ പ്രദേശങ്ങളും എണ്ണൂറാം വയൽ എന്ന പേരിൽ അറിയപ്പെടുന്നത്. ഏതായാലും എണ്ണൂറാം വയലിൽ വയലില്ലെന്ന പോരായ്മ പരിഹരിക്കാൻ കഴിഞ്ഞ ആവേശത്തിലാണ് കുട്ടിക്കർഷകരും അധ്യാപകരും.
