തിരുവനന്തപുരം : സംസ്ഥാനത്ത് ആശങ്കയേറ്റി കോവിഡ് സമ്പര്‍ക്കവ്യാപനവും ആരോഗ്യപ്രവര്‍ത്തകര്‍ക്കിടയിലെ രോഗബാധയും. സംസ്ഥാനത്ത് 20 ദിവസത്തിനിടെ ഡോക്ടര്‍മാരടക്കം 108 ആരോഗ്യപ്രവര്‍ത്തകര്‍ക്കാണ് രോഗം സ്ഥിരീകരിച്ചത്. ആരോഗ്യപ്രവര്‍ത്തകരിലെ രോഗബാധ പ്രതിരോധപ്രവ‍ര്‍ത്തനങ്ങളില്‍ വിള്ളല്‍ വീഴ്ത്തുമോ എന്ന ആശങ്ക ശക്തമാണ്. തിരുവനന്തപുരം മെഡിക്കല്‍ കോളജില്‍ നാലു ദിവസത്തിനുള്ളിൽ ഏഴു ഡോക്ടർമാർക്കും മൂന്നു നഴ്സുമാർക്കും ഉൾപ്പെടെ 18 ജീവനക്കാർക്ക് കോവിഡ് സ്ഥിരീകരിച്ചതോടെ പ്രതിസന്ധി രൂക്ഷമാണ്.
ഇടുക്കിയില്‍ മൂന്നു ഡോക്ടര്‍മാര്‍ക്കടക്കം രോഗം സ്ഥിരീകരിച്ചതോടെ ഹൈറേഞ്ചിലെ ഏഴ് ആശുപത്രികള്‍ അടച്ചു. തൃശ്ശൂരില്‍ 25, എറണാകുളത്ത് 20, ആലപ്പുഴയില്‍ 13 ആരോഗ്യപ്രവര്‍ത്തകരാണ് രോഗബാധിതരായത്. ആരോഗ്യവകുപ്പിലെയും തദ്ദേശസ്ഥാപനങ്ങളിലെയും ജീവനക്കാരുടെ ആശങ്കയകറ്റാന്‍ രണ്ടായിരത്തോളം പേര്‍ പങ്കെടുക്കുന്ന ജംബോ വീഡിയോ കോണ്‍ഫറന്‍സ് മറ്റന്നാള്‍ നടക്കും.
