ചെന്നൈ: തമിഴ്നാട്ടിലെ തിരുപ്പൂര്‍ ജില്ലയില്‍ 15 വയസ്സുള്ള ആണ്‍കുട്ടി ഓടിച്ച കാറിടിച്ച് 11 വയസ്സുകാരി മരിച്ചു. തിങ്കളാഴ്ച നല്ലൂരിനു സമീപം, കാറില്‍ സ്‌കൂളിലേക്ക് പോവുകയായിരുന്ന 15 വയസുകാരന്റെ കാറാണ് നിയന്ത്രണം വിട്ട് പെണ്‍കുട്ടിയെ ഇടിച്ചു. റോഡരികിലൂടെ നടന്നുപോവുകയായിരുന്ന പെണ്‍കുട്ടിയെയാണ് ഇടിച്ചത്. ആണ്‍കുട്ടിയുടെ പിതാവിനെതിരെ പോലീസ് കേസെടുത്തു.
തേനി സ്വദേശികളായ ആദിനാരായണന്റെയും ഗോമതിയുടെയും മകളാണ് മരിച്ച ദീപിക. സ്‌കൂള്‍ അവധിയായിരുന്നതിനാല്‍ ഇവരുടെ മൂന്ന് മക്കളും പിതാവിന്റെ റെസ്റ്റോറന്റില്‍ പോവാറുണ്ടായിരുന്നു. ഇങ്ങനെ ദീപിക റെസ്റ്റോറന്റിലേക്ക് പോകുന്നതിനിടെയാണ് കുട്ടി കാറിടിച്ച് മരിച്ചത്. പ്രായപൂര്‍ത്തിയാകാത്ത ആണ്‍കുട്ടിക്കും പിതാവിനുമെതിരെ അശ്രദ്ധമൂലമുള്ള മരണം ഉള്‍പ്പെടെ മോട്ടോര്‍ വാഹന നിയമത്തിലെ മൂന്ന് വകുപ്പുകള്‍ പ്രകാരം തമിഴ്നാട് പോലീസ് കേസെടുത്തു.
