വില്ലുപുരം: തമിഴ്നാട്ടില് ഞായറാഴ്ച രണ്ട് വ്യത്യസ്ത സംഭവങ്ങളിലായി വ്യാജമദ്യം കഴിച്ച് 13 പേര് മരിക്കുകയും നിരവധി പേരെ ആശുപത്രിയില് പ്രവേശിപ്പിക്കുകയും ചെയ്തു. ചെങ്കല്പട്ട്, വില്ലുപുരം ജില്ലകളിലാണ് വ്യാജമദ്യ ദുരന്തമുണ്ടായത്. വ്യാജമദ്യവും ഗുട്കയും ഉല്പ്പാദിപ്പിച്ച് വിതരണം ചെയ്തതിന് 57 കേസുകള് രജിസ്റ്റര് ചെയ്ത പോലീസ് ഒമ്പത് പേരെ അറസ്റ്റ് ചെയ്തു. കൃത്യനിര്വഹണത്തില് വീഴ്ച വരുത്തിയതിന് നാല് പോലീസ് ഉദ്യോഗസ്ഥരെ സസ്പെന്ഡ് ചെയ്തിട്ടുണ്ട്.
വില്ലുപുരം ജില്ലയിലെ മരക്കാനത്ത് ഒമ്പത് പേരും ചെങ്കല്പട്ട് ജില്ലയിലെ മധുരാന്തകത്ത് നാല് പേരും വ്യാജമദ്യം കഴിച്ച് മരിച്ചു. 35 ഓളം പേര് ചികിത്സയിലാണെന്നും ഇവരില് ചിലരുടെ നില അതീവ ഗുരുതരമാണെന്നും പോലീസ് ഐ.ജി എന് കണ്ണന് അറിയിച്ചു. രണ്ട് സംഭവങ്ങളും തമ്മില് ബന്ധമുണ്ടോയെന്ന് അന്വേഷിക്കുകയാണെന്നും അദ്ദേഹം വ്യക്തമാക്കി.