ഗോവ : പരിശീലനത്തിനിടെ ഹോക്കി ബോള് തലയിൽ കൊണ്ട് 13-കാരി മരിച്ചു. ഗുയിരിം സെൻ്റ് ആൻ്റണി ഹൈസ്കൂളിലെ ഒൻപതാം ക്ലാസ് വിദ്യാർഥിനി റുയീഷ ഖാർസെലിനാണ് ദാരുണ മരണം ഉണ്ടായത്. കഴിഞ്ഞ വ്യാഴാഴ്ചയാണ് സംഭവം നടന്നത്. അടുത്ത അധ്യായന വർഷത്തേക്കുള്ള മത്സരങ്ങള്ക്കായുള്ള തയ്യാറെടുപ്പിനിടെയാണ് അപകടം ഉണ്ടായത്. പരിശീലനം തുടങ്ങിയതിന് അൽപനേരത്തിന് ശേഷം കുട്ടിയുടെ തലയിൽ ഹോക്കി ബോള് കൊള്ളുകയും പിന്നീട് കുഴഞ്ഞുവീഴുകയുമായിരുന്നുവെന്ന് സ്കൂൾ അധികൃതർ പറഞ്ഞു. സ്വാഭാവിക മരണമെന്നാണ് പോലീസ് പറയുന്നത്. പോസ്റ്റ്മോർട്ടം റിപ്പോർട്ട് പുറത്തുവന്നാൽ മാത്രമേ മരണകാരണം എന്താണെന്ന് മനസിലാകുകയുള്ളൂവെന്ന് പോലീസ് അറിയിച്ചു.
‘എല്ലാ ദിവസവും പരീശീലിക്കാറുള്ളതുപോലെ അന്നും ചെയ്തു. സ്കൂള് സമയത്തിൽ തന്നെയാണ് ഈ ദാരുണമായ സംഭവമുണ്ടായത്. റുയീഷയുടെ തലയിൽ ബോള് കൊണ്ടതിന് പിന്നാലെ പെട്ടെന്ന് തന്നെ ആശുപത്രിയിലെത്തിച്ചു.’ സ്കൂള് പ്രിൻസിപ്പാള് പറഞ്ഞു. സഹോദരൻ സൂരജ്, ബിഹാറിൽ വെച്ച് നടന്ന സബ് ജൂനിയർ നാഷണൽ ചാമ്പ്യൻഷിപ്പിൽ ഗോവ സംഘത്തെ നയിച്ച ക്യാപ്റ്റനാണ്. ഇതിൽ നിന്നും പ്രചോദനമുള്ക്കൊണ്ടാണ് റുയീഷയും സ്പോർട്സിലേക്ക് വരുന്നത്.
