മൂലമറ്റം: ചികിത്സയ്ക്കെത്തിയ വിദ്യാര്ഥിയായ ആദിവാസി ബാലനെ വൈദ്യന്റെ വീട്ടില് മരിച്ച നിലയില് കണ്ടെത്തി. അറക്കളം തുംബിച്ചി ഈട്ടിക്കല് മനോജ്-ഷൈലജ ദമ്പതികളുടെ മകന് മഹേഷ് (16) ആണ് മരിച്ചത്. പൂമാല ഹയര് സെക്കന്ഡറി സ്കൂള് പ്ലസ്ടു വിദ്യാര്ഥിയാണ്. കുടയത്തൂരില് വാടകവീട്ടില് താമസിക്കുന്ന മേത്തൊട്ടി കുരുവംപ്ലാക്കല് ജയിംസിന്റെ വീട്ടിലാണു മഹേഷ് മരിച്ചത്.
പുലര്ച്ചെ നാലോടെയായിരുന്നു മരണം. മഹേഷിന്റെ അച്ഛനും അമ്മാവനും ഒപ്പമുണ്ടായിരുന്നു. വൈദ്യര് തന്നെയാണു മരണവിവരം പൊലീസില് അറിയിച്ചത്. മഹേഷ് നാലു മാസം മുന്പു വീടിനു സമീപം വീണിരുന്നുവെന്ന് ബന്ധുക്കള് പറയുന്നു. കാലിനും അരക്കെട്ടിന്റെ ഭാഗത്തും വേദനയുണ്ടായതിനെ തുടര്ന്ന് ചികിത്സകള്ക്കായി കഴിഞ്ഞ ദിവസം മുട്ടത്തെ സ്വകാര്യ ആശുപത്രിയില് എത്തിയിരുന്നു. ഡോക്ടര് എക്സ്റേ എടുത്തു നോക്കണമെന്നു പറഞ്ഞിരുന്നു.
എന്നാല് എക്സ്റേ എടുക്കാതെ അമ്മാവന്റെ പരിചയക്കാരായ കുടയത്തൂരുള്ള നാട്ടു വൈദ്യന്റെ അടുത്തേക്ക് വെള്ളിയാഴ്ച ഉച്ചയോടെ മഹേഷും ബന്ധുക്കളും എത്തി. എന്നാല് ഇന്നലെ പുലര്ച്ചെയോടെ മഹേഷിനെ കട്ടിലില് മരിച്ച നിലയില് കാണ്ടെത്തുകയായിരുന്നു.
സംഭവ സമയം മഹേഷിന്റെ അച്ഛനും അമ്മാവനും സ്ഥലത്തുണ്ടായിരുന്നു. വൈദ്യന് ജയിംസ് തന്നെയാണ് വിവരം പോലീസില് അറിയിച്ചത്. കാഞ്ഞാര് പോലീസ് സ്ഥലത്തെത്തി മൃതദേഹം പോസ്റ്റുമോര്ട്ടത്തിനായി കോട്ടയം മെഡിക്കല് കോളജ് ആശുപത്രിയിലേക്കു മാറ്റി. പോസ്റ്റുമോര്ട്ടത്തിനു ശേഷമേ മരണകാരണം വ്യക്തമാകുകയുള്ളൂവെന്ന് പോലീസ് വ്യക്തമാക്കി.
