പത്തനംതിട്ട : സൗജന്യ വിദ്യാഭ്യാസവും സംരക്ഷണവും വാഗ്ദാനം ചെയ്ത് കൂട്ടികൊണ്ട് പോയ ശേഷം പതിനേഴുകാരനെ മോഷണക്കുറ്റം ആരോപിച്ച് ക്രൂരമായി മര്ദ്ദിക്കുകയും ജോലികള് ചെയ്യിപ്പിക്കുകയും ചെയ്തതായി കുട്ടിയുടെ മാതാവിന്റെ പരാതി. പത്തനംതിട്ട കേന്ദ്രമാക്കി പ്രവര്ത്തിക്കുന്ന എലോഹിം ഗ്ലോബല് വര്ഷിപ്പ് സെന്ററിനെതിരെയാണ് പരാതി ഉയര്ന്നിരിക്കുന്നത്. കട്ടപ്പന അണക്കര എട്ടാം മൈല് കാവുങ്കല് കെസിയമോള് ദേവസ്യയാണ് പതിനേഴ് വയസ് മാത്രം പ്രായമുള്ള തന്റെ മൂത്ത മകന് നേരിട്ട ക്രൂരതകളെക്കുറിച്ച് പുറം ലോകത്തെ അറിയിച്ചത്. സാമ്പത്തികമായി പിന്നോക്കം നില്ക്കുന്ന കുടുംബങ്ങളിലെ കുട്ടികളെ സംരക്ഷിച്ച് പഠിപ്പിച്ച് ജോലി ലഭ്യമാക്കുന്നു എന്ന വാഗ്ദാനം സമൂഹ മാധ്യമങ്ങളില്കൂടി അറിഞ്ഞാണ് കട്ടപ്പന സ്വദേശി കെസിയമോള് ദേവസ്യ ഇവരെ സമീപിച്ചത്.
മാര്ച്ച് 10 ന് മകനെ ഇവിടേയ്ക്ക് അയയ്ക്കുകയും ചെയ്തു. ഹോസ്റ്റലില് താമസിപ്പിക്കുമെന്ന് പറഞ്ഞിരുന്നുവെങ്കിലും വയോജന സംരക്ഷണ കേന്ദ്രത്തിലാണ് കുട്ടിയെ താമസിപ്പിച്ചത്. പിന്നീട് കുട്ടിയെ വിവിധ ജോലികള് ചെയ്യാന് നിയോഗിച്ചു. ഇതോടൊപ്പം വയോജന കേന്ദ്രത്തിലെ അന്തേവാസികളുടെ പരിചരണവും കുട്ടിയെ കൊണ്ട് ചെയ്യിപ്പിച്ചു. ജോലി ചെയ്യാന് വിസമ്മതിച്ചപ്പോള് കഴിഞ്ഞ ആഴ്ചയാണ് സ്ഥാപനത്തിലെ ജീവനക്കാര് മോഷണ കുറ്റം ആരോപിച്ച് കുട്ടിയെ മര്ദ്ദിച്ചത്. മുറിയില് പൂട്ടിയിട്ട ശേഷം വായില് തുണി തിരുകിയാണ് കുട്ടിയെ ക്രൂര മര്ദനത്തിന് ഇരയാക്കിയത്. ഇതോടെ ഇവര് മകനെ തിരികെ കൊണ്ടുവരികയും ആശുപത്രിയില് പ്രവേശിപ്പിക്കുകയും ചെയ്തു.
