ബീജിംങ് : തെക്കുപടിഞ്ഞാറന്‍ ചൈനയിലെ സിചുവാന്‍ പ്രവിശ്യയില്‍ കാട്ടുതീയില്‍ 18 അഗ്നിശമന സേനാംഗങ്ങള്‍ ഉള്‍പ്പെടെ 19 പേര് മരിച്ചു. തീയണക്കുന്നതിനിടെ പെട്ടെന്ന് കാറ്റിന്‍റെ ദിശ മാറി ഇവര്‍ തീയിലകപ്പെടുകയായിരുന്നു. തിങ്കളാഴ്ച ഉച്ച 3.51ന് പ്രദേശത്തെ ഫാമിലാണ് ആദ്യം തീ പിടിച്ചത്. ശക്തമായ കാറ്റില്‍ സമീപത്തെ മലകളിലേക്ക് തീ പടരുകയായിരുന്നുവെന്ന് സിന്‍‌ഹുവ വാര്‍ത്താ ഏജന്‍സി റിപ്പോര്‍ട്ട് ചെയ്തു.
അഗ്നിശമന സേനാംഗങ്ങള്‍ക്ക് വഴിയൊരുക്കിയ ഫാം തൊഴിലാളിയാണ് മരിച്ച മറ്റൊരാള്‍. രക്ഷാപ്രവര്‍ത്തനത്തിന് മുന്നൂറിലധികം അഗ്നിശമന സേനാംഗങ്ങളെയും 700 സൈനികരെയും അയച്ചതായും തീപിടിത്തത്തിന്‍റെ കാരണം അന്വേഷിക്കുകയാണെന്നും സര്‍ക്കാര്‍ വൃത്തങ്ങള്‍ അറിയിച്ചു. ഒരു വര്‍ഷം മുന്‍പ് ഇതേ പ്രവിശ്യയില്‍ കാട്ടുതീ കെടുത്തുന്നതിനിടെ 27 അഗ്നിശമന സേനാംഗങ്ങള്‍ ഉള്‍പ്പെടെ 30 പേര് മരണപ്പെട്ടിരുന്നു.
