കബീര്ധാം: ഹോം തിയറ്റര് പൊട്ടിത്തെറിച്ച് രണ്ട് പേര് മരിച്ചു. നവവരനും ഇയാളുടെ ജ്യേഷ്ഠനുമാണ് മരിച്ചത്. ഛത്തീസ്ഗഡിലെ കബീര്ധാം ജില്ലയിലാണ് സംഭവം. സ്ഫോടനത്തില് കുടുംബത്തിലെ ഒന്നര വയസ്സുള്ള കുട്ടിയടക്കം 4 പേര്ക്ക് പരിക്കേറ്റു. എല്ലാവരെയും ആശുപത്രിയില് പ്രവേശിപ്പിച്ചിരിക്കുകയാണ്. വിവാഹ സമ്മാനമായി ലഭിച്ച ഹോം തിയറ്റര് പൊട്ടിത്തെറിച്ചാണ് അപകടം ഉണ്ടായത്. തിങ്കളാഴ്ചയാണ് സ്ഫോടനം നടന്നതെന്നും സ്ഫോടനത്തിന്റെ കൃത്യമായ കാരണം ഇതുവരെ അറിവായിട്ടില്ലെന്നും പോലീസ് അറിയിച്ചു.
മരിച്ച ഹേമേന്ദ്ര മെരാവി(22) ഏപ്രില് ഒന്നിനാണ് വിവാഹിതനായത്. തിങ്കളാഴ്ച ഹേമേന്ദ്ര തന്റെ കുടുംബാംഗങ്ങള്ക്കൊപ്പം വീടിന്റെ മുറിക്കുള്ളില് വിവാഹ സമ്മാനങ്ങള് അഴിക്കുകയായിരുന്നുവെന്ന് കബീര്ധാം അഡീഷണല് പോലീസ് സൂപ്രണ്ട് മനീഷ താക്കൂര് പറഞ്ഞു. ഇതിനിടെ സമ്മാനമായി ലഭിച്ച ഹോം തിയേറ്റര് ഓണ് ചെയ്തതതും വന് സ്ഫോടനമുണ്ടായി. മെരാവി സംഭവസ്ഥലത്ത് തന്നെ മരിച്ചു. ചികിത്സയിലിരിക്കെ ഇയാളുടെ സഹോദരന് രാജ്കുമാറും(30) മരണപ്പെട്ടു.
