ഹൈദരാബാദ് : ഗോകാര്‍ട്ടിങിനിടെ മുടി കുരുങ്ങി പെണ്‍കുട്ടിക്ക് ദാരുണമരണം. ഹൈദരാബാദ് സ്വദേശിനയും ബി ടെക് വിദ്യാര്‍ത്ഥിനിയുമായ ശിവവര്‍ഷിണിയാണ്(20) മരിച്ചത്. സുഹൃത്തുക്കള്‍ക്കൊപ്പം ഗുറാം ഗുഡയിലെ അമ്യൂസ്മെന്‍റ് പാര്‍ക്കില്‍ എത്തിയതായിരുന്നു ശിവവര്‍ഷിണി. ഇവിടെ ഗോകാര്‍ട്ട് ഉപയോഗിക്കുന്നതിനിടെ ചക്രങ്ങളില്‍ പെണ്‍കുട്ടിയുടെ മുടി കുടുങ്ങുകയായിരുന്നു. അപകടത്തില്‍പ്പെട്ട ശിവവര്‍ഷിണിയുടെ നിലവിളി കേട്ട് ആളുകള്‍ എത്തി ഉടന്‍ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.
ഗോകാര്‍ട്ടിന്‍റെ ചക്രത്തില്‍ ശിവവര്‍ഷിണിയുടെ മുടി കുടുങ്ങി ശിരോചര്‍മം വേര്‍പ്പെട്ടിരുന്നു. ധരിച്ചിരുന്ന ഹെല്‍മറ്റും തകര്‍ന്നു. ശിവവര്‍ഷിണി അപകടത്തില്‍പ്പെടുന്നതിന്‍റെ ദൃശ്യങ്ങള്‍ സുഹൃത്തുക്കളുടെ ഫോണില്‍ പതിഞ്ഞിട്ടുണ്ട്. ഗോകാര്‍ട്ട് സോണ്‍ നടത്തിപ്പുകാരുടെ അശ്രദ്ധയാണ് അപകടത്തിനു കാരണമെന്നു ശിവവര്‍ഷിണിയുടെ ബന്ധുക്കള്‍ ആരോപിച്ചു. ഗോകാര്‍ട്ട് നടത്തിപ്പുകാര്‍ക്കെതിരെ അവര്‍ മീര്‍പേട്ട് പോലീസ് സ്റ്റേഷനില്‍ പരാതി നല്‍കി.
