ദില്ലി: ആര്ബിഐ 2000 രൂപ കറന്സി നോട്ടുകള് പ്രചാരത്തില് നിന്ന് പിന്വലിച്ചതിന് പിന്നാലെ ക്ഷേത്രത്തിലെ കാണിക്ക വഞ്ചിയില് നിന്നും എട്ട് ലക്ഷം രൂപ മൂല്യമുള്ള രണ്ടായിരത്തിന്റെ നോട്ടുകെട്ടുകള് കണ്ടെത്തി. ഹിമാചല് പ്രദേശിലെ കാന്ഗ്ര ജില്ലയിലുള്ള മാ ജ്വാല ദേവി ക്ഷേത്രത്തിന്റെ പരിസരത്ത് സ്ഥാപിച്ചിട്ടുള്ള കാണിക്കവഞ്ചിയില് നിന്നുമാണ് നോട്ടുകെട്ടുകള് കണ്ടെടുത്തത്. നാനൂറ് കറന്സി നോട്ടുകള് ഉണ്ടായിരുന്നു.
ക്ഷേത്ര സമുച്ചയത്തിലെ സംഭാവനപ്പെട്ടിയില് വഴിപാടായി നിക്ഷേപിച്ച നിലയിലാണ് 2000 രൂപ നോട്ടുകള് കണ്ടെത്തിയത്. നിരവധി ഭക്തര് ക്ഷേത്രം സന്ദര്ശിക്കാറുണ്ടെന്നും പലപ്പോഴും ഇത്തരം വഴിപാടുകള് നടത്താറുണ്ടെന്നും ക്ഷേത്രത്തിലെ ജൂനിയര് എഞ്ചിനീയര് സുരേഷ് കുമാര് പറഞ്ഞു. ക്ഷേത്രത്തിലെ ഭക്തരുടെ സൗകര്യങ്ങള് മെച്ചപ്പെടുത്തുന്നതിനാണ് സംഭാവനപ്പെട്ടിയിലെ ആകെ തുക ചെലവഴിക്കുക.
