റാന്നി: മാമ്പാറ – മണിയാര് റോഡിന്റെ മണിയാറില് തിട്ടല് ഇടിഞ്ഞ ഭാഗത്ത് സംരക്ഷണഭിത്തി കെട്ടുന്നതിന് 25 ലക്ഷം രൂപയുടെ അനുമതി ലഭിച്ചതായി അഡ്വ. പ്രമോദ് നാരായണ് എംഎല്എ പറഞ്ഞു. പൊതുമരാമത്ത് വകുപ്പിന്റെ ഉടമസ്ഥതയിലുള്ള എരുവാറ്റുപുഴ – മാമ്പാറ – മണിയാര് റോഡ് മണിയാറില് ഡാമിന് താഴെ കക്കാട്ടാറിനോട് ചേര്ന്നുള്ള ഭാഗമാണ് തിട്ടല് ഇടിഞ്ഞ് അപകടാവസ്ഥയില് ആയിരിക്കുന്നത്. ഇവിടം കെട്ടി സംരക്ഷിക്കുന്നതിനാണ് ഫണ്ട് അനുവദിച്ചിരിക്കുന്നത്. നദീതീരമായതിനാല് കോണ്ക്രീറ്റ് ദിത്തി കെട്ടിയാകും ഇവിടം സംരക്ഷിക്കുക. 20 മീറ്ററില് അധികം നീളത്തിലും 7 മീറ്ററോളം ഉയരത്തിലും ആണ് സംരക്ഷണഭിത്തി കോണ്ക്രീറ്റ് ചെയ്യുക.
നേരത്തെ 70 ലക്ഷത്തോളം രൂപാ മുടക്കി ഗാബിയോണ് സാങ്കേതികവിദ്യ ഉപയോഗിച്ച് ഇവിടെ കല്ലുകൊണ്ട് സംരക്ഷണഭിത്തി കെട്ടിയിരുന്നു. എന്നാല് മഹാപ്രളയത്തെ തുടര്ന്ന് അടിത്തറ ഒലിച്ചു പോയതോടെ കെട്ട് അപകടാവസ്ഥയിലാവുകയും കുറച്ചുഭാഗം ഇടിഞ്ഞ് നദിയിലേക്ക് വീഴുകയും ചെയ്തു. ഇതോടെ റോഡിന്റെ വീതി കുറയുകയും വാഹനങ്ങള്ക്ക് കഷ്ടിച്ച് കടന്നുപോകാന് മാത്രം പറ്റുന്ന അവസ്ഥയിലുമായി. നദിയില് കുത്തൊഴുക്കുണ്ടായാല് റോഡ് വീണ്ടും കൂടുതല് അപകടാവസ്ഥയിലാകും. ഇത് മനസ്സിലാക്കിയാണ് ഈ ഭാഗം കെട്ടി സംരക്ഷിക്കണമെന്ന് എംഎല്എ ആവശ്യപ്പെട്ടത്.
