കണ്ണൂര് : വയോധികന്റെ ദേഹത്ത് മദ്യം ഒഴിച്ച് തീകൊളുത്തിയ സംഭവത്തില് രണ്ടു പേരെ പോലീസ് അറസ്റ്റ് ചെയ്തു. മാങ്ങാട്ടിടം സ്വദേശികളായ വൈഷ്ണവ്, വജീഷ് എന്നിവരെയാണ് കൂത്തുപറമ്പ് പോലീസ് അറസ്റ്റ് ചെയ്തത്. ശങ്കരനെല്ലൂരിലെ പി.ഗംഗാധരന്റെ ദേഹത്താണ് മദ്യം ഒഴിച്ച് തീകൊളുത്തിയത്. കഴിഞ്ഞ ദിവസം രാത്രിയായിരുന്നു സംഭവം.
മദ്യപിക്കുന്നതിനിടെ ബാക്കി വന്ന മദ്യം കഴിക്കുന്നത് സംബന്ധിച്ച തര്ക്കമാണ് ആക്രമണത്തില് കലാശിച്ചത്. വാക്കുതര്ക്കത്തിന് പിന്നാലെ ഇരുവരും ചേര്ന്ന് ഗംഗാധരന്റെ ദേഹത്ത് മദ്യം ഒഴിച്ച് തീ കൊളുത്തുകയായിരുന്നു. നിലവിലവിളി കേട്ടെത്തിയ നാട്ടുകാരാണ് ഇയാളെ ആശുപത്രിയില് പ്രവേശിപ്പിച്ചത്. ഗംഗാധരന്റെ നെഞ്ചിലും കൈകളിലുമാണ് ഗുരുതരമായി പൊള്ളലേറ്റത്. സംഭവത്തില് പ്രതികള്ക്കെതിരെ വധശ്രമത്തിനാണ് കേസ് എടുത്തിരിക്കുന്നത്.
കോടതിയില് ഹാജരാക്കിയ പ്രതികളെ കോടതി റിമാന്റ് ചെയ്തു. ഗംഗാധരന് അപകട നില തരണം ചെയ്തതായി പോലീസ് അറിയിച്ചു.
