പത്തനംതിട്ട : അടൂര് മരുതിമൂട് സെന്റ് ജോര്ജ്ജ് കത്തോലിക്ക പള്ളിക്ക് മുമ്പില് മൂന്ന് ദിവസം പ്രായമുള്ള പെണ്കുഞ്ഞിനെ ഉപേക്ഷിച്ച നിലയില് കണ്ടെത്തി. പ്രദേശത്തെ സിസിടിവി ദൃശ്യങ്ങളടക്കം ശേഖരിച്ച് ആരാണ് കുഞ്ഞിനെ ഉപേക്ഷിച്ചതെന്ന് കണ്ടെത്താനാണ് പോലീസിന്റെ ശ്രമം. സംഭവത്തിന്റെ ദൃശ്യങ്ങള് പോലീസ് പരിശോധിച്ചുവരികയാണ്.
ആശുപത്രിയില് നടന്ന പ്രസവത്തിലല്ല കുഞ്ഞ് ജനിച്ചതെന്നാണ് പ്രാഥമികമായി അറിയാന് കഴിയുന്നത്. വീട്ടിലോ മറ്റെവിടെയോ ആണ് പ്രസവം നടന്നിരിക്കുന്നത്. കുഞ്ഞിന്റെ പൊക്കിള്ക്കൊടി മുറിച്ചുമാറ്റിയ രീതി കണ്ടാല് ഇക്കാര്യം വ്യക്തമാണെന്നും പോലീസ് പറഞ്ഞു.
കുഞ്ഞ് നിലവില് ശിശുക്ഷേമ സമിതിയുടെ സംരക്ഷണയിലാണെന്ന് ജില്ലാ ചൈല്ഡ് വെല്ഫയര് കമ്മിറ്റി ചെയര്മാന് അഡ്വ. ടി. സക്കീര് ഹുസൈന് അറിയിച്ചു. സംഭവത്തില് പോലീസിന്റെ റിപ്പോര്ട്ട് ചൈല്ഡ് വെല്ഫയര് കമ്മിറ്റിക്ക് ലഭിച്ചിട്ടുണ്ട്. കുഞ്ഞിനെ ഉപേക്ഷിച്ചനിലയില് കണ്ടെത്തിയ സംഭവമായതിനാല് കേന്ദ്രസര്ക്കാരിന്റെ വെബ് പോര്ട്ടലിലടക്കം വിവരം പ്രസിദ്ധീകരിക്കും. ഇതിന്റെ തുടര് നടപടികള്ക്കായി ജില്ലാ ചൈല്ഡ് പ്രൊട്ടക്ഷന് ഓഫീസറെ ചുമതലപ്പെടുത്തിയതായും അദ്ദേഹം പറഞ്ഞു.
