തിരുവനന്തപുരം: കന്യാകുളങ്ങര സര്ക്കാര് ആശുപത്രിയില് ഒപി ടിക്കറ്റ് എടുക്കാനായി ക്യൂവില് നിന്ന വയോധികയുടെ മാല മോഷ്ടിക്കാന് ശ്രമിച്ച സംഭവത്തില് മൂന്നു സ്ത്രീകള് പിടിയില്. തമിഴ്നാട് മധുര സ്വദേശികളായ നന്ദിനി, സിന്ധു, ഗോപിക എന്നിവരാണ് അറസ്റ്റിലായത്. വയോധിക ഒപി ടിക്കറ്റ് എടുക്കാനായി ക്യൂവില് നില്ക്കുമ്പോള് പുറകില് യുവതികളില് ഒരാള് വന്നു നില്ക്കുകയും തുടര്ന്ന് കഴുത്തില് കിടന്ന മാല പൊട്ടിക്കുകയുമായിരുന്നു. തൊട്ടടുത്തുനിന്ന ഒരാള് ഇത് കണ്ട് യുവതിയെ ചോദ്യം ചെയ്തു. തുടര്ന്ന് മാല നിലത്തേക്ക് എറിഞ്ഞ യുവതി സഹായികളായ മറ്റ് രണ്ട് യുവതികളോടൊപ്പം കടന്നുകളയാന് ശ്രമിക്കുകയായിരുന്നു. സംഭവം കണ്ട ആശുപത്രിയിലുണ്ടായിരുന്നവര് ഇവരെ ബലമായി തടഞ്ഞുനിര്ത്തി. തുടര്ന്ന് വെഞ്ഞാറമൂട് പോലീസെത്തി മൂന്നു യുവതികളെയും കസ്റ്റഡിയിലെടുക്കുകയായിരുന്നു.
