തിരുവനന്തപുരം : ശമ്പള വിതരണം മുടങ്ങിയ കെ എസ് ആര് ടി സിക്ക് 30 കോടി രൂപ അനുവദിച്ച് ധനവകുപ്പ്. മാര്ച്ചിലെ ശമ്പള വിതരണം മുടങ്ങിയതിനെ തുടര്ന്ന് തൊഴിലാളി യൂണിയനുകള് സമരം പ്രഖ്യാപിച്ച പശ്ചാത്തലത്തിലാണ് സര്ക്കാറിന്റെ ഇടപെടല്. വിഷു വരെ കാത്തിരിക്കുമെന്നും അതിന് ശേഷം അനിശ്ചിതകാല സമരം നടത്തുമെന്നുമാണ് ഭരണാനുകൂല യൂണിയനുകള് അടക്കം പ്രഖ്യാപിച്ചത്. ശമ്പള വിതരണത്തിനും വായ്പ തിരിച്ചടക്കുന്നതിനുമായി നേരത്തേ 202 കോടി അനുവദിച്ചിരുന്നു.
നിലവിലെ ധനസഹായം തികയില്ലെന്ന് കെ എസ് ആര് ടി സി അറിയിച്ചു. 75 കോടി വേണമെന്നാണ് ആവശ്യപ്പെട്ടിരുന്നത്. അതിനിടെ കെ എസ് ആര് ടി സിയുടെ പുതിയ കമ്ബനിയായ കെ സ്വിഫ്റ്റിന്റെ ആഡംബര ബസുകള് അപകടത്തില് പെട്ട സംഭവത്തില് രണ്ട് ഡ്രൈവര്മാരെ പിരിച്ചുവിട്ടു. സര്വീസ് ആരംഭിച്ച് പിറ്റേന്ന് തന്നെ തിരുവനന്തപുരത്തും മലപ്പുറത്തുമാണ് അപകടമുണ്ടായത്.
