തിരുവല്ല : പെരിങ്ങര വാട്ടര് ടാങ്കിന് മുകളില് സംശയകരമായ നിലയില് കാണപ്പെട്ട നാല് യുവാക്കളെ നാട്ടുകാര് പിടികൂടി പോലീസില് ഏല്പ്പിച്ചു. തലവടി കറുത്തങ്കേരി വീട്ടില് മോഹിത് (23), പെരിങ്ങര കാരയ്ക്കല് കുത്തിയോട്ട് പറമ്പില് വീട്ടില് രാജിത് (20), ചാത്തങ്കേരി മുണ്ടകത്തില് രാജേഷ് (22), വെണ്പാല തുണ്ടിയില് വീട്ടില് പ്രണവ് (20) എന്നിവരെയാണ് പിടികൂടിയത്. കാരയ്ക്കല് സ്വാമിപാലത്തെ ജലവിതരണ വകുപ്പിന്റെ ടാങ്കിന് മുകളില് നിന്നും ഇന്ന് പുലര്ച്ചെ മൂന്ന് മണിയോടെ ഇവരെ പിടികൂടിയത്.
പുലര്ച്ചെ മുറ്റത്തേക്കിറങ്ങിയ സമീപ വാസിയാണ് ടാങ്കിന് മുകളില് യുവാക്കളെ കണ്ടത്. ഇതോടെ ഇയാള് മൊബൈലിലൂടെ അയല്വാസികളെ വിവരമറിയിച്ചു. തുടര്ന്നാണ് നാട്ടുകാര് ചേര്ന്ന് നാലംഗ സംഘത്തെ പിടികൂടി പോലീസിന് കൈമാറിയത്. പിടിയിലായവരുടെ ക്രിമിനല് പശ്ചാത്തലം സംബന്ധിച്ച് അന്വേഷണം ആരംഭിച്ചതായി പോലീസ് പറഞ്ഞു.
