ലക്നൗ: ജയിലില് തടവില് കഴിയുന്ന ഒരു തടവുകാരനെ ഷോപ്പിംഗ് മാളിലേക്ക് കൊണ്ടുപോയ പോലീസുകാരെ സസ്പെന്ഡ് ചെയ്തു. എസ്ഐ രാംസേവക്, കോണ്സ്റ്റബിള്മാരായ അനൂജ് ധാമ, നിതിന് റാണ, രാമചന്ദ്ര പ്രജാപതി എന്നിവരെ കൃത്യവിലോപത്തിന് സസ്പെന്ഡ് ചെയ്തതായി ലഖ്നൗ പോലീസ് കമ്മീഷണറേറ്റ് പ്രസ്താവനയില് അറിയിച്ചു. കഴിഞ്ഞ വര്ഷം ജൂണില് റിഷഭ് റായി എന്നയാളെ ആയുധ നിയമത്തിന്റെ പേരില് അറസ്റ്റ് ചെയ്ത് ജയിലിലടച്ചതായി പോലീസ് ഉദ്യോഗസ്ഥര് പറഞ്ഞു. റായിക്ക് ചില ആരോഗ്യപ്രശ്നങ്ങള് ഉണ്ടെന്ന് പരാതിപ്പെടുകയും മാര്ച്ച് 7 ന് സര്ക്കാര് ആശുപത്രി സന്ദര്ശിക്കാന് കോടതി അനുമതി നല്കുകയും ചെയ്തു. റായിയെ ആശുപത്രിയില് എത്തിക്കാനും വൈദ്യപരിശോധനയ്ക്ക് ശേഷം ജയിലിലേക്ക് തിരികെ കൊണ്ടുവരാനും പോലീസ് ഉദ്യോഗസ്ഥരെ വിന്യസിച്ചു. എന്നാല് ആശുപത്രിയില് നിന്ന് മടങ്ങുമ്പോള് കുറ്റാരോപിതരായ പോലീസുകാര് അദ്ദേഹത്തെ ഷോപ്പിംഗ് മാളിലേക്ക് കൊണ്ടുപോവുകയായിരുന്നു.
പ്രതിയെ ഷോപ്പിംഗ് മാളിലേക്ക് കൊണ്ടുപോവുന്നതിന്റെ വീഡിയോ പ്രതി തന്നെ എടുത്ത് സാമൂഹ്യമാധ്യമങ്ങളിലൂടെ പ്രചരിപ്പിച്ചു. ഇത് ശ്രദ്ധയില് പെട്ടതോടെ പോലീസുകാരെ സസ്പെന്ഡ് ചെയ്യുകയായിരുന്നു. സംഭവത്തില് നാലുപേരെ സസ്പെന്ഡ് ചെയ്തതായി ലഖ്നൗ പോലീസ് അറിയിച്ചു. മാളിലെ റായിയുടെ വീഡിയോ സോഷ്യല് മീഡിയയില് വൈറലാവുകയും ചെയ്തിരുന്നു.