മുംബൈ: പിതാവിന്റെ പുനർവിവാഹ തീരുമാനത്തെ എതിർത്ത 20കാരിയായ മകളെ കൊലപ്പെടുത്തിയ 45കാരനായ പിതാവ് അറസ്റ്റിൽ. വിഷം കലർത്തിയ ബിരിയാണി നൽകിയശേഷം മകളുടെ കഴുത്തുഞെരിച്ചെന്നാണ് പോലീസിന്റെ നിഗമനം. മുംബൈയിലെ വഡാലയിലാണ് സംഭവം. കൊല്ലപ്പെട്ടത് റിഫാത്ത് എന്ന യുവതിയാണ്. മരപ്പണിക്കാരനായ ഷരീഫ് റാസ ഹുസൈൻ ഖാനെയാണ് പോലീസ് അറസ്റ്റ് ചെയ്തത്. ഭക്ഷ്യവിഷബാധയെത്തുടർന്നാണ് മകൾ മരിച്ചതെന്ന് വരുത്തിത്തീർക്കാൻ പ്രതി ശ്രമിച്ചെന്നാണ് പോലീസിന്റെ പ്രാഥമിക നിഗമനം. എന്നാൽ യുവതിയുടെ കഴുത്തിൽ പാടുകൾ കണ്ടെത്തിയതോടെ മരണത്തിൽ ദുരൂഹത ഉയർന്നു. തുടർന്ന് നടത്തിയ പോസ്റ്റ്മോർട്ടം പരിശോധനയിൽ കഴുത്തിൽ മുറുക്കിയതിന്റെ അടയാളങ്ങൾ കണ്ടെത്തിയതായി പോലീസ് അറിയിച്ചു.
മറ്റൊരു മകളായ 16കാരി നുസ്ഹത്തിനെയും കൊലപ്പെടുത്താൻ ഷരീഫ് പദ്ധതിയിട്ടിരുന്നതായും പോലീസ് പറഞ്ഞു. എന്നാൽ സംഭവദിവസം രാത്രി അമ്മായിയുടെ വീട്ടിൽ താമസിക്കാൻ പോയതിനാൽ പെൺകുട്ടി രക്ഷപെട്ടതായാണ് റിപ്പോർട്ട്. സംഭവത്തിൽ കൂടുതൽ അന്വേഷണം തുടരുകയാണ്.
