ഡല്‍ഹി : നവരാത്രി ആഘോഷങ്ങള്‍ക്കിടെ രാജ്യത്തിന്റെ വിവിധ ഭാഗങ്ങളില്‍ വന്‍ സ്ഫോടനത്തിന് പദ്ധതിയിട്ട ആറ് ഭീകരരെ ഡല്‍ഹി പോലീസിന്റെ സ്പെഷ്യല്‍ സെല്‍ പിടികൂടി. ഇവരില്‍ നിന്ന് സ്ഫോടക വസ്തുക്കളടക്കം വന്‍ ആയുധ ശേഖരവും പിടിച്ചെടുത്തു. പിടിയിലായ ഭീകരരില്‍ രണ്ട് പേര്‍ പാകിസ്ഥാനില്‍ പരിശീലനം നേടിയവരാണെന്നും ഡല്‍ഹിയിലും മുംബൈയിലും ഭീകരാക്രമണം നടത്താന്‍ ഇവര്‍ പദ്ധതിയിട്ടിരുന്നു എന്നുമാണ് വിവരം.
ഡല്‍ഹി, മുംബൈ അടക്കമുള്ള രാജ്യത്തെ പ്രധാന നഗരങ്ങളില്‍ നവരാത്രി ആഘോഷങ്ങള്‍ക്കിടെ വന്‍ സ്ഫോടനം നടത്താനായി ഭീകരര്‍ ആസൂത്രണം ചെയ്തിരുന്നു എന്ന് പോലീസ് വ്യക്തമാക്കി. ഭീകരരുടെ നീക്കത്തെക്കുറിച്ച്‌ രഹസ്യാന്വേഷണം വിവരം ലഭിച്ചതിന്റെ അടിസ്ഥാനത്തില്‍ അന്വേഷണത്തിനായി ഡല്‍ഹി പോലീസ് പ്രത്യേക സംഘത്തെ ചുമതലപ്പെടുത്തുകയായിരുന്നു. ഡല്‍ഹി, മഹാരാഷ്ട്ര, ഉത്തര്‍പ്രദേശ് എന്നീ സംസ്ഥാനങ്ങളിലെ വിവിധ ഭാഗങ്ങളില്‍ സ്പെഷല്‍ സെല്‍ നടത്തിയ വ്യാപകമായ റെയ്ഡിലാണ് സംഘത്തെ പിടികൂടിയത്.
