പറവൂർ: ആറാം ക്ലാസ് വിദ്യാർത്ഥിനിയെ കെഎസ്ആർടിസി ബസിൽ അപമാനിച്ച ബസ് ഡ്രൈവറെ സർവീസിൽ നിന്ന് സസ്പെൻഡ് ചെയ്തു. പറവൂർ സബ് ഡിപ്പോയിലെ ഡ്രൈവർ, വടക്കേക്കര സ്വദേശി ആന്റണി വി. സെബാസ്റ്റ്യനെയാണ് വകുപ്പ് വിജിലൻസിന്റെ അന്വേഷണത്തെ തുടർന്ന്, സസ്പെൻഡ് ചെയ്തത്.
2023 ജനുവരി 30-ന് പരാതിക്കാസ്പദമായ സംഭവം. പറവൂർ ഡിപ്പോയിൽ നിന്ന് ചാത്തനാടേക്ക് സർവീസ് നടത്തിയ ആർഎൻസി 388 നമ്പർ ബസിലാണ് സംഭവം നടന്നത്. പറവൂർ പുല്ലങ്കുളം ശ്രീനാരായണ ഹയർ സെക്കൻഡറി സ്കൂളിലെ ആറാം ക്ലാസ് വിദ്യാർത്ഥിനിയാണ് പരസ്യമായ അപമാനത്തിന് ഇരയായത്.
വൈകുന്നേരം നാലിന് സ്കൂൾ വിട്ട് ചാത്തനാടുള്ള വീട്ടിലേക്ക് പോകുന്നതിന് മറ്റു കുട്ടികൾക്കൊപ്പം ബസിൽ ഇരിക്കുമ്പോഴായിരുന്നു സംഭവം. കുട്ടിയോട് കുശലം ചോദിച്ച് ബസിലെത്തിയ ആന്റണി സെബാസ്റ്റ്യൻ കുട്ടിയുടെ ചുമലിൽ കൈകൊണ്ട് അടിച്ചു. ഇതിനെതിരേ കുട്ടിയുടെ അമ്മ കെഎസ്ആർടിസി അധികൃതർക്ക് പരാതി നൽകിയതിൻരെ അടിസ്ഥാനത്തിലാണ് വിജിലൻസ് അന്വേഷണം ആരംഭിച്ചത്. എസ്എസ്ക്യൂ 5 എറണാകുളം വിജിലൻസ് ഇൻസ്പെക്ടർ ഇൻ ചാർജ് കെ.കെ. ശിവദാസന്റെ അന്വേഷണത്തിൽ ആന്റണി വി. സെബാസ്റ്റ്യൻ കുറ്റക്കാരനെന്ന് കണ്ടെത്തി റിപ്പോർട്ട് സമർപ്പിച്ചതിനെ തുടർന്നാണ് നടപടി.
