പത്തനംതിട്ട : കേന്ദ്ര പരിസ്ഥിതി മന്ത്രാലത്തിന്റെ പശ്ചിമഘട്ടത്തിലെ പരിസ്ഥിതിലോല മേഖല സംബന്ധിച്ച വിജ്ഞാപനത്തില് പത്തനംതിട്ട ജില്ലയിലെ 7 വില്ലേജുകള് ഉള്പ്പെട്ടതോടെ ആശങ്കയിലായി ജനങ്ങള്. കോന്നി താലൂക്കിലെ ചിറ്റാര്, സീതത്തോട്, അരുവാപ്പുലം, തണ്ണിത്തോട് വില്ലേജുകളും റാന്നി താലൂക്കിലെ വടശ്ശേരിക്കര, പെരുനാട്, കൊല്ലമുള വില്ലേജുകളുമാണ് പരിസ്ഥിതിലോല മേഖല വിജ്ഞാപനത്തില് ഉള്പ്പെട്ടിരിക്കുന്നത്. വിജ്ഞാപനം പുറത്ത് വന്നതോടെ ഈ സ്ഥലങ്ങളില് കാലങ്ങളായി താമസിച്ച് വരുന്നവര് വലിയ ആശങ്കയിലാണ്. ജനവാസ മേഖലകളെയും കൃഷി ഭൂമികളെയും വിജ്ഞാപനത്തില് ഉള്പ്പെടുത്തരുതെന്ന് ജനങ്ങള് നിരന്തരമായി അവശ്യപ്പെടുന്നതിനിടെയാണ് പുതിയ വിജ്ഞാപനത്തിലും ഈ വില്ലേജുകള് ഉള്പ്പെട്ടിരിക്കുന്നത്.
വന്യജീവി സാങ്കേതങ്ങള്ക്കും ദേശീയോദ്യാനങ്ങള്ക്കും ഒരു കിലോമീറ്റര് പരിധിയില് എങ്കിലും പരിസ്ഥിതിലോല മേഖല വേണമെന്ന നിബന്ധന പെരുനാട്, കൊല്ലമുള വില്ലേജുകളെ പ്രതികൂലമായി ബാധിക്കാന് സാധ്യതയുണ്ട്. ഈ രണ്ട് വില്ലേജുകളും പെരിയാര് വന്യജീവി സാങ്കേതവുമായി ബന്ധപ്പെട്ട് കിടക്കുന്ന പ്രദേശങ്ങളുമാണ്. കൊല്ലമുള വില്ലേജിലെ പമ്പാവാലി, അരയാഞ്ഞിലിമണ്ണ്, കുറുമ്പന്മൂഴി, മണക്കയം പ്രദേശങ്ങള് ശബരിമലയോട് ചേര്ന്ന പ്രദേശങ്ങളാണ്. പെരുനാട് പഞ്ചായത്തിലെ അട്ടത്തോട് മേഖലയെയും ഇത് സാരമായി ബാധിക്കും.
ശബരിമലയും പമ്പയും പെരിയാര് കടുവാ സാങ്കേതത്തിലും ഉള്പ്പെടും. പരിസ്ഥിതിലോല മേഖലയില് നിന്നും കൈവശ ഭൂമികള് ഒഴിവാക്കിയില്ലെങ്കില് ജനങ്ങള്ക്ക് ഈ മേഖലയില് കൃഷി ചെയ്യാന് രാസവളമോ കീടനാശിനികളോ ഉപയോഗിക്കാന് കഴിയാതെ വരും. മുപ്പത് ശതമാനം ചെരിവുള്ള സ്ഥലങ്ങളില് കൃഷിയിറക്കുവാനോ മരം മുറിക്കുവാനോ കഴിയില്ല. ജനങ്ങള്ക്ക് ആവശ്യമായ അടിസ്ഥാന സൗകര്യ വികസനങ്ങള് ഒരുക്കുന്നതിനെയും ഇത് സാരമായി ബാധിക്കും എന്ന് ആശങ്കയുണ്ട്.
