തിരുവനന്തപുരം : തിരുവനന്തപുരം മെഡിക്കല് കോളജില് കോവിഡ് കൂട്ടമരണങ്ങള് ഉണ്ടായെന്ന ഞെട്ടിക്കുന്ന വെളിപ്പെടുത്തല്. ഈ മാസം 12ന് ഇവിടെ 70 കോവിഡ് മരണങ്ങളുണ്ടായെന്നാണ് ഡോക്ടര്മാരുടെ സംഘടനയായ കേരള ഗവണ്മെന്റ് പോസ്റ്റ് ഗ്രാജുവേറ്റ് മെഡിക്കല് ടീച്ചേഴ്സ് അസോസിയേഷന് വെളിപ്പെടുത്തിയിരിക്കുന്നത്. അതേ സമയം ആരോപണത്തെ തള്ളി ആശുപത്രി സൂപ്രണ്ട് രംഗത്തെത്തി. ഒരു വാര്ത്താ ചാനലാണ് ഈ വാര്ത്ത പുറത്തുവിട്ടത്.
70 കോവിഡ് മരണങ്ങള് ഒരു ദിവസമുണ്ടായതായാണ് ഡോക്ടര്മാറുടെ വാര്ത്താക്കുറിപ്പില് പറയുന്നത്. എന്നാല് മൃതദേഹം മാറ്റാന് മോര്ച്ചറിയില് സ്ഥലമില്ലായിരുന്നു. 50 മൃതദേഹങ്ങള് സൂക്ഷിക്കാന് ശേഷിയുള്ള മോര്ച്ചറിയില് അതില് കൂടുതല് മൃതദേഹങ്ങള് സൂക്ഷിച്ചെന്ന ആരോപണവും സംഘടന ആവര്ത്തിക്കുന്നു. സംസ്ഥാനത്ത് ആകെ 95 മരണങ്ങളെന്ന് ആരോഗ്യവകുപ്പ് അവകാശപ്പെടുന്ന ദിവസമായിരുന്നു തിരുവനന്തപുരം മെഡിക്കല് കോളജില് മാത്രം 70 മരണങ്ങളെന്ന് ഡോക്ടര്മാരുടെ വാര്ത്താകുറിപ്പില് വ്യക്തമാക്കുന്നു.
കോവിഡ് ബാധിച്ച് പന്ത്രണ്ടാം തീയതി മെഡിക്കല് കോളജില് മരിച്ച 52 കാരന്റെ മൃതദേഹം മോര്ച്ചറിയിലേക്ക് മാറ്റാതെ 15 മണിക്കൂറാണ് 28ാം വാര്ഡില് കിടന്നത്. ഇതില് ഡോക്ടര്മാരും നഴ്സുമാരും കുറ്റക്കാരാണെന്ന തരത്തിലേക്ക് അന്വേഷണ റിപ്പോര്ട്ട് തയാറാകുന്നതിനിടെയാണ് ഡോക്ടര്മാരുടെ വെളിപ്പെടുത്തല്.
എന്നാല് ആരോപണത്തെ മെഡിക്കല് കോളജ് സൂപ്രണ്ട് ഡോ. ഷര്മദ് തള്ളിക്കളഞ്ഞു. കോവിഡും കോവിഡേതര മരണങ്ങളും 40 എന്നാണ് മെഡിക്കല് കോളജിന്റെ വിശദീകരണം. എന്നാല് ആ ദിവസം 70 മൃതദേഹങ്ങള് മോര്ച്ചറിയിലുണ്ടായിരുന്നുവെന്നും മെഡിക്കല് കോളജ് സൂപ്രണ്ട് സമ്മതിക്കുന്നുണ്ട്.
