കൊച്ചി : വൃക്കരോഗികളെ സഹായിക്കാന് 750 രൂപ ചാലഞ്ചുമായി ഹൈബി ഈഡന് എംപി. വരാപ്പുഴ അതിരൂപതയുടെ സാമൂഹ്യ സേവന വിഭാഗം എറണാകുളം സോഷ്യല് സര്വീസ് സൊസൈറ്റിയുമായി ചേര്ന്നാണു പദ്ധതി നടപ്പിലാക്കുന്നത്. 10 ഡയാലിസിസുകള്ക്കുള്ള തുക എറണാകുളം സോഷ്യല് സര്വീസ് സൊസൈറ്റിയുടെ രക്ഷാധികാരികൂടിയായ വരാപ്പുഴ അതിരൂപത മെത്രാപ്പൊലീത്ത ഡോ. ജോസഫ് കളത്തിപ്പറമ്പിലിനു കൈമാറിയാണു പദ്ധതിക്കു തുടക്കമിട്ടത്.
ഇഎസ്എസ്എസ് ഡയറക്ടര് ഫാദര് മാര്ട്ടിന് അഴിക്കകത്തിന്റെ മേല് നോട്ടത്തിലാണു പദ്ധതി നടപ്പിലാക്കുന്നത്. മാര്ച്ച് 15 മുതല് ഡയാലിസിസുകള്ക്കുള്ള അപേക്ഷകള് എംപി ഓഫീസില് സ്വീകരിക്കും. മുന് ഡിഎംഒ ഡോ. ജുനൈദ് റഹ്മാന്റെ നേതൃത്വത്തിലുള്ള വിദഗ്ധ സംഘം അപേക്ഷകള് വിശദമായി പരിശോധിച്ച് ഓരോരുത്തര്ക്കും നിശ്ചിത സൗജന്യ ഡയാലിസിസ് ലഭ്യമാക്കുന്നതിനുള്ള നടപടികള് സ്വീകരിക്കും. പദ്ധതിക്കു വേണ്ടി പ്രത്യേകമായി തുറന്നിരിക്കുന്ന ബാങ്ക് അക്കൗണ്ടുകള് എറണാകുളം സോഷ്യല് സര്വീസ് സൊസൈറ്റിയുടെ പേരില് പണം നല്കി പദ്ധതിയില് പങ്കാളിയാകാനാണു അവസരം. കൃത്യമായ ഓഡിറ്റിങ് സംവിധാനങ്ങള് ഉള്ള ഒരു ചാരിറ്റബിള് ഓര്ഗനൈസേഷന് ആണ് ഇഎസ്എസ്എസ് എന്ന് ഹൈബി ഈഡന് എംപി പറഞ്ഞു.
