റാന്നി: നവതി നിറവിൽ കുര്യാക്കോസ് മാർ ക്ലീമീസ് വലിയ മെത്രാപ്പോലീത്തയുടെ 90-ാം ജന്മദിനം 26 ശനിയാഴ്ച വിവിധ പരിപാടികളോടു കൂടി വെച്ചൂച്ചിറ പെരുന്തേനരുവി മാർ ബസേലിയോസ് ഗ്രിഗോറിയോസ് മേഴ്സി ഹോം അങ്കണത്തിൽ വെച്ച് നടത്തും. മലങ്കര ഓർത്തഡോക്സ് സഭ വലിയ മെത്രാപ്പോലീത്ത, ബത്തേരി, തുമ്പമൺ ഭദ്രാസനങ്ങളുടെ മുൻ അദ്ധ്യക്ഷൻ, സഭ പരിസ്ഥിതി കമ്മീഷൻ ചെയർമാൻ, വെച്ചൂച്ചിറ മാർ ബസേലിയോസ് ഗ്രിഗോറിയോസ് മേഴ്സി ഹോം, മാരാമൺ സമഷ്ടി തുടങ്ങിയ ഒട്ടേറെ ജീവകാരുണ്യ, പരിസ്ഥിതി സംരക്ഷണ സ്ഥാപനങ്ങളുടെ തുടക്കക്കാരനുമായ തിരുമേനിയുടെ താല്പര്യ പ്രകാരമാണ് ഈ സ്ഥലം തെരഞ്ഞെടുത്തത്.
11ന് മേഴ്സി ഹോം ട്രസ്റ്റ് പൊതുയോഗം, 12.30 ന് ജന്മദിന കേക്ക് മുറിക്കൽ, മേഴ്സി ഹോം അംഗങ്ങളോട് ഒപ്പം ഉച്ചഭക്ഷണം, 2.30 ന് വിദ്യാര്ത്ഥികളുമായി ജീവിതാനുഭവങ്ങൾ പങ്കുവെക്കൽ, നവതി വൃക്ഷ തൈ നടീൽ തുടർന്ന് 3ന് നവതി പൊതുസമ്മേളനം മുന് ഡി.ജി.പി ഡോ. അലക്സാണ്ടർ ജേക്കബ് സമ്മേളനം ഉദ്ഘാടന ചെയ്യും. അഭിവന്ദ്യ ഡോ. ജോഷ്വ മാർ നിക്കോദിമോസ് തിരുമേനിയുടെ അദ്ധ്യക്ഷത വഹിക്കും. സഭ സെക്രട്ടറി അഡ്വ. ബിജൂ ഉമ്മൻ മുഖ്യ പ്രഭാഷണം നടത്തുന്നതും തുടർന്ന് പൗരാവലിയുടെ മംഗള പത്ര സമർപ്പണം, ആദരിക്കൽ, തിരുമേനിയുടെ മറുപടി പ്രസംഗം, 5 ന് സ്നേഹവിരുന്നും നടത്തുമെന്ന് സ്വാഗത സംഘത്തിനു വേണ്ടി ചെയർമ്മാൻ ടി.കെ.ജയിംസ്, മേഴ്സിഹോം ഡയറക്ടർ സിസ്റ്റർ തബീഥ, സെക്രട്ടറി എബ്രാഹാം മാരേട്ട് എന്നിവർ അറിയിച്ചു.
