കോതമംഗലം: കാട്ടാനകളുടെ ആക്രമണത്തില്‍ ഭൂതത്താന്‍കെട്ടില്‍ കെഎസ്‌ഇബി ക്യാംപ് ഓഫിസില്‍ വന്‍ നാശനഷ്ടം. ഒരാഴ്ചയായി ഭൂതത്താന്‍കെട്ട് വടാട്ടുപാറ റോഡില്‍ നിലയുറപ്പിച്ച ആനക്കൂട്ടമാണ് കഴിഞ്ഞ രാത്രി തുണ്ടം ഫോറസ്റ്റ് ഓഫിസിന് എതിര്‍വശത്തുള്ള കെഎസ്‌ഇബി ഓഫിസിലെത്തിയാണ് ആക്രമണം നടത്തിയത്.
പൂട്ടിയിരുന്ന വാതില്‍ തകര്‍ത്ത് അകത്തു കടന്ന ആനകള്‍ ഓഫിസിനുള്ളിലെ ഫര്‍ണിച്ചറുകള്‍ കേടു വരുത്തി. അകത്തെ വാതിലും കസേരയും മേശയും തകര്‍ന്ന നിലയിലാണ്. ഭൂതത്താന്‍കെട്ട്- വടാട്ടുപാറ- ഇടമലയാര്‍ റോഡുകളില്‍ വേനല്‍ക്കാലത്തു രാത്രി കാട്ടാനകളുടെ സാന്നിധ്യം പതിവാണ്. കുട്ടിയാനകളടക്കം 23 ആനകളാണ് സംഘത്തിലുള്ളത്.
