ബംഗളൂരു: പിതാവ് കോടിയേരി ബാലകൃഷ്ണന്റെ ആരോഗ്യസ്ഥിതി തീരെ മോശമാണെന്നും അടിയന്തിരമായി കുറച്ച് ദിവസം നാട്ടില് കുടുംബത്തെ കാണാന് ജാമ്യം അനുവദിക്കണമെന്നും കോടതിയില് ജാമ്യാപേക്ഷ നല്കി ബിനീഷ് കോടിയേരി. കളളപ്പണം വെളുപ്പിച്ച കേസില് തടവില് കഴിയുന്ന ബിനീഷിന്റെ ജാമ്യാപേക്ഷ പരിഗണിക്കവെയാണ് ഇന്ന് ബിനീഷിന്റെ അഭിഭാഷകന് ഇക്കാര്യം കോടതിയില് അറിയിച്ചത്.
കോടിയേരി ബാലകൃഷ്ണന്റെ ആരോഗ്യനില മോശമായതിനാല് ഇടക്കാല ജാമ്യം ബിനീഷിന് അനുവദിക്കണമെന്നായിരുന്നു അഭിഭാഷകന്റെ വാദം. ഇക്കാര്യത്തില് തടസമെന്താണെന്ന് കോടതിയും ചോദിച്ചു. എന്നാല് ഇഡിയ്ക്ക് വേണ്ടി കേസില് ഹാജരായ സോളിസിറ്റര് ജനറല് ഇത് ശക്തമായി എതിര്ത്തു. മയക്കുമരുന്ന് ഇടപാടുമായി ബന്ധപ്പെട്ട കേസില് ഇടക്കാല ജാമ്യം നേടാന് നിയമമില്ലെന്ന് അദ്ദേഹം വാദിച്ചു. കേസ് ഇനി ഒരാഴ്ചയ്ക്ക് ശേഷം മേയ് 12ന് പരിഗണിക്കാന് കോടതി മാറ്റി. കഴിഞ്ഞ ഏഴ് മാസങ്ങളായി കളളപ്പണം വെളുപ്പിച്ച കേസില് ബിനീഷ് റിമാന്ഡില് കഴിയുകയാണ്.