തിരുവനന്തപുരം : കെപ്കോയുടെ വിൽപനശാലകളിൽ കോഴിയിറച്ചി വില കുതിച്ചുയരുന്നു. കെപ്കോയുടെ പുതുക്കിയ വില പ്രകാരം ബ്രോ‍യിലർ ചിക്കന് (തൊലിയോടു കൂടിയത്) കിലോയ്ക്ക് 220.80 രൂപയും, തൊലി‍യില്ലാത്തതിന് 224.25 രൂപയുമാണ്. കറി‍കട്ടിന്റെ വില കിലോയ്230 രൂപയാണ് കെപ്‍കോയിലെ വില. പൊതുവിപണിയെക്കാളും കിലോയ്ക്ക് 107 മുതൽ 117 രൂപ വരെയാണ് കെപ്കോ ഈടാക്കുന്നതെന്നാണ് പരാതി.
20 ദിവസം മുൻപ് പൊതു വിപണിയിൽ കോഴിയിറച്ചി വില കിലോയ്ക്ക് 147 രൂപ വരെ എത്തിയിരുന്നു. എന്നാൽ നിലവിൽ കോഴിയിറച്ചി വില കുറയുകയാണ്. രണ്ടു ദിവസം മുൻപ് കടകളിൽ കിലോയ്ക്ക് 110 മുതൽ 120 രൂപ വരെയായിരുന്നു. എന്നാൽ കെപ്കോ വില കുറിച്ചിട്ടില്ല. പൊതുവിപണിയിൽ കോഴിയിറച്ചിയുടെ വില ഉയർന്നു നിൽക്കുന്ന സാഹചര്യം കണക്കാക്കിയാണ് കെപ്കോ കഴിഞ്ഞ വ്യാഴാഴ്ച മുതൽ വില കൂട്ടിയത്.
