ചോറ്റാനിക്കര : ക്ഷേത്രദര്‍ശനത്തിനെത്തിയ യുവാക്കളെ മര്‍ദിച്ച സംഭവത്തില്‍ ആരോപണവിധേയനായ ചോറ്റാനിക്കര പോലീസ് സ്റ്റേഷന്‍ എസ്.ഐ ബാബുവിനെ സസ്പെന്‍ഡ് ചെയ്തു. കോഴിക്കോട് സ്വദേശി പി.ടി. മിഥുന്‍, കൊല്ലം സ്വദേശി കെ. സെയ്താലി എന്നിവരെ മര്‍ദിച്ചെന്ന പരാതിയില്‍, പുത്തന്‍കുരിശ് ഡിവൈ.എസ്.പി അജയ്‌നാഥിന്റെ നേതൃത്വത്തില്‍ നടത്തിയ അന്വേഷണത്തിനൊടുവിലാണ് എസ്.ഐയെ സസ്പെന്‍ഡ് ചെയ്ത് റേഞ്ച് ഐ.ജി ഉത്തരവിറക്കിയത്.
ചോറ്റാനിക്കര ക്ഷേത്രത്തില്‍ ദര്‍ശനത്തിന് വന്ന യുവാക്കളെ എസ്.ഐ ബാബു മുഖത്തും നെഞ്ചത്തും അടിക്കുകയും ബൂട്ട്‌സ്‌ കൊണ്ട് നടുവിനു ചവിട്ടി പരിക്കേല്‍പിക്കുകയും തടയാന്‍ ശ്രമിച്ച സുഹൃത്ത് മിഥുനെ ഉപദ്രവിക്കുകയും ചെയ്ത കേസിലാണ് നടപടി. യുവാക്കളെ ഇനി ഇവിടെ കണ്ടാല്‍ നട്ടെല്ല് ചവിട്ടിയെടിക്കുമെന്ന് ഭീഷണിപ്പെടുത്തി എസ്.ഐയും സംഘവും വഴിയില്‍ ഉപേക്ഷിച്ച്‌ മടങ്ങുകയായിരുന്നു. സംഭവ സ്ഥലത്തു നിന്ന് ലഭിച്ച വീഡിയോ ദൃശ്യങ്ങളും അന്വേഷണ വിവരങ്ങളും എതിരായതോടെയാണ് എസ്.ഐക്കെതിരെ സസ്പെന്‍ഷന്‍ ഉത്തരവിറങ്ങിയത്.
