കോന്നി : മഴക്കാലത്തെ വെള്ളക്കട്ട് വൈദ്യുതി മുടക്കം സൃഷ്ടിക്കുന്നതിനാല്‍ അരുവാപ്പുലം ഗ്രാമപഞ്ചായത്തിലെ അണപ്പടിയിലെ ട്രാന്‍സ്ഫോര്‍മര്‍ ഇവിടെ നിന്ന് മാറ്റി സ്ഥാപിക്കണമെന്ന് നാട്ടുകാര്‍ ആവശ്യപ്പെട്ടു. കഴിഞ്ഞ ദിവസമുണ്ടായ ശക്തമായ മഴയെ തുടര്‍ന്ന് അധികൃതര്‍ രാവിലെ 10.45 ന് ട്രാന്‍സ്ഫോര്‍മര്‍ ലിങ്ക് ഓഫ് ചെയ്തിരുന്നു. റോഡിലേക്ക് വെള്ളം കയറി വരുന്നത് കണ്ട പ്രദേശവാസികള്‍ വിളിച്ചറിയിച്ചാണ് ലിങ്ക് ഓഫ് ചെയ്തത്. എന്നാല്‍ വെള്ളം കുറഞ്ഞതിന് ശേഷം രാത്രി ഒന്‍പത് മണിക്ക് ലൈന്‍ ഓണ്‍ ചെയ്യണമെന്ന് കെ.എസ്.ഇ.ബി അധികൃതരെ വിളിച്ചറിയിട്ടും അധികൃതര്‍ ലിങ്ക് ഓണ്‍ ചെയ്തില്ലെന്ന് നാട്ടുകാര്‍ പറഞ്ഞു.
രാത്രി പതിനൊന്ന് മണി വരെയും ലിങ്ക് ഓണ്‍ ചെയ്യാതിരുന്നതിനാല്‍ കനത്ത മഴയില്‍ പ്രദേശം ഇരുട്ടിലാവുകയും പ്രദേശത്തെ കുട്ടികളും സ്ത്രീകളും ഭയപ്പാടോടെ കഴിയേണ്ടാതായി വന്നു. ജനപ്രതിനിധികളടക്കം വിളിച്ച് പറഞ്ഞതിനെ തുടര്‍ന്ന് മറ്റൊരു സെക്ഷന്‍ എ ഇ വകയാര്‍ സെക്ഷന്‍ എ ഇ യെ വിളിച്ച് ലിങ്ക് ഓണ്‍ചെയ്യാമെന്ന് ധരിപ്പിക്കുകയും ചെയ്തു. എന്നാല്‍ സ്ഥലത്തെ ലൈന്‍മാന്‍മാര്‍ എ ഇ യെ തെറ്റി ധരിപ്പിക്കുന്ന നടപടിയാണ് സ്വീകരിച്ചത്. തുടര്‍ന്ന് സിപിഐ അരുവാപ്പുലം ലോക്കല്‍ സെക്രട്ടറി സന്തോഷ് കൊല്ലന്‍പടിയും പ്രദേശവാസികളും ചേര്‍ന്ന് എ ഇ ഒ ഓട് സംസാരിക്കുകയും മഴയ്ക്ക് ശമനമുണ്ടെങ്കില്‍ ലൈന്‍ ഓണ്‍ ചെയ്യാമെന്ന് എ ഇ സമ്മതിക്കുകയും ചെയ്തു.
എന്നാല്‍ സ്ഥലത്ത് എത്തിയ ലൈന്‍മാന്‍മാര്‍ ലൈന്‍ ഓണ്‍ ചെയ്യാന്‍പറ്റാത്ത അവസ്ഥയാണെന്ന് ജനങ്ങളെ തെറ്റിധരിപ്പിച്ച് തിരികെ പോയി. ട്രാന്‍സ്ഫോര്‍മറില്‍ തങ്ങിനിന്ന ചപ്പുചവറുകള്‍ മാറ്റുവാന്‍ പോലും ഇവര്‍ തയ്യാറായില്ലെന്ന് നാട്ടുകാര്‍ പറഞ്ഞു. ലൈന്‍മാന്‍മാരുടെ ഈ സമീപനം സ്ഥലത്ത് വാക്കുതര്‍ക്കത്തിനും ഇടയാക്കി. തുടര്‍ന്ന് രാത്രി 11.30ന് ശേഷമാണ് വൈദ്യുതി പുനഃസ്ഥാപിച്ചത്.
