ഒറ്റപ്പാലം : പണമാവശ്യപ്പെട്ട് നൽകാത്തതിന് അമ്മയെ വെട്ടിപ്പരിക്കേൽപ്പിച്ച കേസിൽ മകൻ അറസ്റ്റിൽ. അമ്പലപ്പാറ വേങ്ങശ്ശേരി അമ്പലംകുന്ന് സുരേഷിനെയാണ് (48) ഒറ്റപ്പാലം പോലീസ് അറസ്റ്റ് ചെയ്തത്. അമ്മ കല്യാണിയെ (75) വെട്ടിപ്പരിക്കേൽപ്പിപ്പിച്ച കേസിലാണ് അറസ്റ്റ്. മദ്യം വാങ്ങുന്നതിനായി പണമാവശ്യപ്പെട്ട് നൽകാതിരുന്നപ്പോഴാണ് വെട്ടിപ്പരിക്കേൽപ്പിച്ചതെന്നും പരിക്ക് ഗുരുതരമല്ലെന്നും ഒറ്റപ്പാലം പോലീസ് അറിയിച്ചു. വധശ്രമത്തിനാണ് പോലീസ് കേസെടുത്തിട്ടുള്ളത്.
കഴിഞ്ഞ 23 ന് രാത്രിയിലാണ് സംഭവം. കിടപ്പുമുറിയിൽ കട്ടിലിൽ കിടക്കുകയായിരുന്ന കല്യാണിയെ പണം നൽകാത്തതിന് വെട്ടുകത്തികൊണ്ടാണ് വെട്ടിപ്പരിക്കേൽപ്പിച്ചത്. ഇടത് ചെവിയിലും കഴുത്തിലുമാണ് പരിക്ക്. കല്യാണിയെ ഒറ്റപ്പാലം താലൂക്ക് ആശുപത്രിയിൽ പ്രവേശിപ്പിച്ചു. വെട്ടിയപ്പോൾ കട്ടിലിന്റെ ഭാഗങ്ങളിൽ തട്ടിയതിനാൽ പരിക്ക് ഗുരുതരമായില്ല. തുടർന്ന് സുരേഷിനെ ഒറ്റപ്പാലം പോലീസ് അറസ്റ്റ് ചെയ്ത് കോടതിയിൽ ഹാജരാക്കി റിമാൻഡ് ചെയ്തു.