കുന്നംകുളം : ലൈഫ് ഇന്‍ഷുറന്‍സ് ഏജന്‍റ് കോഓപറേറ്റിവ് സൊസൈറ്റി എന്ന സ്ഥാപനത്തിലെ നിക്ഷേപത്തട്ടിപ്പിന്റെ പേരില്‍ ആരോപണ വിധേയയായ കുന്നംകുളം നഗരസഭ ചെയര്‍പേഴ്സന്‍ സീത രവീന്ദ്രന്‍ രാജിവെക്കണമെന്നാവശ്യപ്പെട്ട് കൗണ്‍സില്‍ യോഗത്തില്‍ ബഹളം. അജണ്ട വായിക്കാന്‍പോലും കഴിയാതിരുന്നതോടെ യോഗം പിരിച്ചുവിട്ടു. പ്രതിയാക്കപ്പെട്ട സാഹചര്യം വിശദീകരിക്കണമെന്ന് കോണ്‍ഗ്രസ്, ബി.ജെ.പി, ആര്‍.എം.പി അംഗങ്ങള്‍ ആവശ്യപ്പെട്ടതാണ് ബഹളത്തിന് കാരണം. ചെയര്‍പേഴ്സന്‍ സംഭവം വിശദീകരിക്കും മുമ്പേ ഭരണകക്ഷി അംഗം മറുപടി പറഞ്ഞത് തൃപ്തികരമാകാതിരുന്ന കോണ്‍ഗ്രസ് അംഗങ്ങളും തൊട്ടുപിറകെ ബി.ജെ.പിക്കാരും നടുത്തളത്തിലിറങ്ങി മുദ്രാവാക്യം മുഴക്കി. ഇതോടെ അജണ്ട വായിക്കാന്‍ ചെയര്‍പേഴ്സന്‍ ആവശ്യപ്പെട്ടു. തുടര്‍ന്ന് കോണ്‍ഗ്രസ് അംഗം ബിജു ക്ലര്‍ക്കില്‍നിന്ന് അജണ്ട പിടിച്ചുവാങ്ങി. ചെയര്‍പേഴ്സന്റെ രാജി ആവശ്യപ്പെട്ട് പ്രതിഷേധം ശക്തമാക്കിയതോടെ യോഗം ബെല്‍ മുഴക്കി പിരിച്ചുവിട്ട് ചെയര്‍പേഴ്സന്‍ ഇറങ്ങിപ്പോയി.
നിക്ഷേപിച്ച പണം ലഭിക്കാഞ്ഞ ആര്‍ത്താറ്റ് സ്വദേശിനി കോടതിയെ സമീപിച്ചതിനെ തുടര്‍ന്ന് കോടതി നിര്‍ദേശപ്രകാരമാണ് ചെയര്‍പേഴ്സന്‍ അടക്കം സൊസൈറ്റി ഡയറക്ടര്‍മാര്‍ക്കെതിരെ കേസെടുത്തത്. പിന്നീട് കുന്നംകുളം പോലീസ് ചെയര്‍പേഴ്സനെ കേസില്‍നിന്ന് ഒഴിവാക്കി. സീത രവീന്ദ്രന്‍ ഡയറക്ടര്‍ ആയിരിക്കുന്ന കാലയളവ് മുതല്‍ ആര്‍ത്താറ്റ് സ്വദേശിനി പണം നിക്ഷേപിച്ചിരുന്നതായി പറയുന്നു. ഭരണസ്വാധീനം ഉപയോഗിച്ച്‌ ചെയര്‍പേഴ്സനെ ഒഴിവാക്കിയെന്നാണ് പ്രതിപക്ഷ ആരോപണം. പ്രതിഷേധ സമരത്തിന് ബി.ജെ.പി പാര്‍ലമെന്ററി പാര്‍ട്ടി നേതാവ് കെ.കെ മുരളി നേതൃത്വം നല്‍കി. കൗണ്‍സിലര്‍മാരായ ഗീത ശശി, രേഷ്മ സുനില്‍, രേഖ സജീവ്, സോഫിയ ശ്രീജിത്ത്, സിഗ്മ രജീഷ്, ദിവ്യ വിജീഷ് എന്നിവരും ഉണ്ടായിരുന്നു. കോണ്‍ഗ്രസ് അംഗങ്ങള്‍ ബിജു സി ബേബിയുടെ നേതൃത്വത്തിലാണ് പ്രതിഷേധിച്ചത്. കൗണ്‍സിലര്‍മാരായ ഷാജി ആലിക്കല്‍, ലെബീബ് ഹസന്‍, മിനി മോണ്‍സി തുടങ്ങിയ അംഗങ്ങളും ഉണ്ടായിരുന്നു.
