കോന്നി : തണ്ണിത്തോട് എലിമുള്ളുംപ്ലാക്കൽ സ്വദേശി അംബികക്ക് വീട്ടിലേക്ക് കയറുവാൻ ഇനി വീഴുമോ എന്ന ഭയം വേണ്ട. വർഷങ്ങളായി വീട്ടിലേക്ക് കയറുവാൻ വഴി ഇല്ലാതിരുന്ന ഘട്ടത്തിൽ എലിമുള്ളുംപ്ലാക്കൽ ഐ എച്ച് ആർ ഡി കോളേജ് എൻ എസ് എസ് യൂണിറ്റ് വിദ്യാർഥികൾ അംബികയുടെ വീട്ടിലേക്ക് വഴി നിർമ്മിച്ച് നൽകി. പ്ലാവിനാകുഴി പുത്തൻ വീട്ടിൽ ഇ കെ അംബികയും പെണ്മക്കളും ഭർത്താവിന്റെ സഹോദരിയും ആണ് ഇവിടെ താമസം.
ശാരീരിക അസ്വസ്ഥത ഉണ്ടായിരുന്നതിനാല്‍ ഉയർന്ന സ്ഥലത്ത് നിർമ്മിച്ചിരിക്കുന്ന വീട്ടിലേക്ക് കയറുവാൻ ഇവർ ഏറെ ബുദ്ധിമുട്ടിയിരുന്നു. സ്ത്രീകൾ മാത്രമുള്ള വീടായതിനാലും സാമ്പത്തിക സ്ഥിതി ഇല്ലാത്തതിനാലും വഴി നിർമ്മിക്കുവാൻ സാധിക്കാതെ വന്ന അവസ്ഥയിലാണ് വിദ്യാർഥികൾ തുണയായത്. എൻ എസ് എസ് പ്രോഗ്രാം ഓഫീസർ സൂര്യ എസ് സന്തോഷിന്റെ നേതൃത്വത്തിൽ ഇരുപത്തിയൊന്ന് വിദ്യാർഥികൾ നിർമ്മാണ പ്രവർത്തനങ്ങളിൽ പങ്കാളികളായി.
