തിരുവനന്തപുരം : മലയിന്‍കീഴില്‍ വനിതാ ഡോക്ടറെ പീഡിപ്പിച്ചെന്ന കേസില്‍ പ്രതിയായ സി.ഐ. എ.വി സൈജുവിനെ സസ്പെന്‍ഡ് ചെയ്യാന്‍ ശുപാര്‍ശ. അന്വേഷണം ക്രൈംബ്രാഞ്ചിന് കൈമാറാനും നിര്‍ദേശമുണ്ട്. അതേസമയം പരാതിക്കാരിയായ വനിത ഡോക്ടര്ക്കെതിരെ കേസെടുക്കാനുള്ള നീക്കങ്ങളും തുടങ്ങി. മലയിന്‍കീഴ് സ്റ്റേഷനിലെ എസ്‌എച്ച്‌ഒയായിരുന്ന എ.വി സൈജുവിനെതിരെ കേസെടുത്തിട്ട് മൂന്ന് ദിവസമായി. മലയിന്‍കീഴില്‍നിന്ന് പോലീസ് ആസ്ഥാനത്തേക്ക് സ്ഥലം മാറ്റിയതല്ലാതെ മറ്റ് നടപടികളൊന്നും സ്വീകരിച്ചിട്ടില്ല.
അതിനിടെയാണ് കാട്ടാക്കട ഡി.വൈ.എസ്.പി സൈജുവിനെതിരെ റിപ്പോര്‍ട്ട് നല്‍കിയത്. സൈജു ഗുരുതര കേസില്‍ പ്രതിയാണെന്നും പോലീസുദ്യോഗസ്ഥന് വേണ്ട അച്ചടക്കവും പെരുമാറ്റരീതിയും ലംഘിച്ചെന്നുമാണ് റിപ്പോര്‍ട്ട്. അച്ചടക്ക നടപടി സ്വീകരിക്കണമെന്നും ശുപാര്‍ശയുണ്ട്. ഈ റിപ്പോര്‍ട്ട് തിരുവനന്തപുരം റൂറല്‍ എസ്.പി ദിവ്യാ ഗോപിനാഥ് ദക്ഷിണേഖല ഐജിക്ക് കൈമാറി. നടപടിയില്‍ ഉടന്‍ തീരുമാനമുണ്ടായേക്കും. സൈജുവിനെതിരായ അന്വേഷണം സംസ്ഥാന ക്രൈംബ്രാഞ്ചിന് കൈമാറാനും ശുപാര്‍ശയുണ്ട്. നിലവില്‍ കേസ് അന്വേഷിക്കുന്ന ജില്ലാ ക്രൈംബ്രാഞ്ച് ഡി.വൈ.എസ്.പി യാണ് പ്രാഥമിക തെളിവുകള്‍ ശേഖരിച്ച ശേഷം ഉന്നത അന്വേഷണത്തിന് ശുപാര്‍ശ ചെയ്തത്. വിവാഹവാഗ്ദാനം നല്‍കി രണ്ട് വര്‍ഷത്തോളം വനിതാ ഡോക്ടറെ പീഡിപ്പിച്ചെന്നാണ് പരാതി. പരാതിക്കാരിയുടെ രഹസ്യമൊഴിയെടുക്കാനുള്ള നടപടി തുടങ്ങി. അതിനിടെ സൈജുവിന്റെ ഭാര്യയുടെ പരാതിയില്‍ വനിതാ ഡോക്ടര്ക്കെതിരെ കേസെടുക്കാനും നീക്കമുണ്ട്. ഭീഷണിപ്പെടുത്തി പണം തട്ടാന്‍ ശ്രമിക്കുന്നുവെന്നാണ് പരാതി.
