തിരുവനന്തപുരം : കഴക്കൂട്ടത്ത് കെ-റെയില് വിരുദ്ധ സമരത്തിനിടെ പോലീസ് ഉദ്യോഗസ്ഥന്റെ ചവിട്ടേറ്റ പള്ളിപ്പുറം കുഴിവിള പുത്തന്വീട്ടില് ജോയി പോലീസ് കംപ്ലയിന്റ് അതോറിറ്റി, പട്ടികജാതി കമ്മീഷന്, മനുഷ്യാവകാശ കമ്മീഷന് എന്നിവര്ക്ക് പരാതി നല്കി. മംഗലപുരം സ്റ്റേഷനിലെ സിവില് പോലീസ് ഓഫിസര് ഷബീറിനെ പുറത്താക്കണമെന്നും നിയമ നടപടി സ്വീകരിക്കണമെന്നും ആവശ്യപ്പെട്ടാണ് പരാതി നല്കിയത്. ഏപ്രില് 22ന് കരിച്ചാറയില് നടന്ന കെ-റെയില് കല്ലിടല് പ്രതിഷേധത്തിനിടെയാണ് ജോയിക്ക് നേരെ പോലീസുകാരന്റെ അതിക്രമമുണ്ടായത്. മുന്വൈരാഗ്യം തീര്ക്കുന്നതിന് മനഃപൂര്വം ഷബീര് തന്നെ ആക്രമിക്കുകയായിരുന്നെന്നാണ് പരാതിയില് ആരോപിക്കുന്നത്.
പൊതുപ്രവര്ത്തകനായ തനിക്കുനേരെ മംഗലപുരം പോലീസ് സ്റ്റേഷനില് വെച്ചും ഈ സംഭവത്തിന് മുമ്പും ഒരു ദിവസവും മോശമായി പെരുമാറിയെന്നു പരാതിയില് പറയുന്നു. പ്രതിഷേധത്തിനിടെതന്നെ കണ്ട പോലീസുകാരന് അസഭ്യം പറഞ്ഞ് തന്റെ അരികിലേക്ക് എത്തുകയും അടിവയറ്റില് ബൂട്ടുകൊണ്ട് ചവിട്ടുകയുമായിരുന്നു. അതിനു ശേഷം അടിവയറ്റില് വേദനയും മൂത്രമൊഴിക്കാന് ബുദ്ധിമുട്ടുണ്ടെന്നും 45കാരനായ ജോയി ആരോപിക്കുന്നു. ഷബീറിനെതിരെ മനുഷ്യാവകാശ കമീഷന് നേരത്തേതന്നെ അന്വേഷണത്തിന് ഉത്തരവിട്ടിരുന്നു. പട്ടികജാതി കമീഷനും പോലീസ് കംപ്ലയിന്റ് അതോറിറ്റിയും ഉചിത നടപടി കൈക്കൊള്ളണമെന്നാണ് പരാതിക്കാരന്റെ ആവശ്യം.