റാന്നി: പൊതുമേഖല ബാങ്കുകളേക്കാൾ സഹകരണ പ്രസ്ഥാനങ്ങളാണ് ഗ്രാമീണമേഖലയിലെ പാവപ്പെട്ടവർക്ക് എന്നും ആശ്രയമായി നിൽക്കുന്നതെന്ന് ആരോഗ്യമന്ത്രി വീണ ജോർജ് പറഞ്ഞു. റാന്നി സർവീസ് സഹകരണ ബാങ്കിൽ ആരംഭിച്ച സീനിയർ സിറ്റിസൺ കൗണ്ടർ ഉദ്ഘാടനം ചെയ്തു സംസാരിക്കുകയായിരുന്നു മന്ത്രി. ജില്ലയിലെ ആദ്യ സൂപ്പർ ഗ്രേഡ് ബാങ്ക് ആണ് റാന്നി സർവീസ് സഹകരണ ബാങ്ക്. കെട്ടിടത്തിന് ഒന്നാം നിലയിലാണ് ബാങ്ക് പ്രവർത്തിച്ചിരുന്നത്.
മുതിർന്ന സഹകാരികൾക്ക് പടി കേറി ഇവിടെ എത്താനുള്ള അസൗകര്യം കണക്കാക്കിയാണ് ഇവരുടെ സൗകര്യാർത്ഥം താഴത്തെ നിലയിൽ ആധുനിക സൗകര്യങ്ങളോടെയുള്ള പുതിയ കൗണ്ടറും മറ്റു സജ്ജീകരണങ്ങളും ഒരുക്കിയത്. ബാങ്ക് പ്രസിഡണ്ട് ബിനോയ് കുര്യാക്കോസ് അധ്യക്ഷനായി. അഡ്വ. പ്രമോദ് നാരായൺ എംഎൽഎ, സർക്കിൾ സഹകരണ യൂണിയൻ പ്രസിഡൻറ് പി ആർ പ്രസാദ്, പഞ്ചായത്ത് പ്രസിഡൻറ് ശോഭ ചാർലി, ശശികല രാജശേഖരൻ, വി ജി അജയകുമാർ, ജോജോ കോവൂര്‍,തെക്കേപ്പുറം വാസുദേവന്‍, കെ.പി തോമസ്, സി. എന്‍ രാജൻ,വിപിന്‍ പി. പൊന്നപ്പന്‍ എന്നിവർ പ്രസംഗിച്ചു.
