കോ‌ട്ടയം : എകെജി സെന്ററിന് നേരെ ബോംബേറുണ്ടായതില്‍ പ്രതിഷേധിച്ച്‌ കോട്ടയത്ത് സിപിഎം പ്രവര്‍ത്തകര്‍ നടത്തിയ മാര്‍ച്ചിനിടെ കോണ്‍ഗ്രസ് ജില്ലാ കമ്മിറ്റി ഓഫീസിന് നേരെ കല്ലേറ്. സംഭവത്തില്‍ ഡിസിസി ഓഫീസിന്റെ ചില്ലുകള്‍ തകര്‍ന്നു. ഡിസിസി ഓഫീസിന് നേരെയുണ്ടായ ആക്രമണം പോലീസ് സംരക്ഷണയിലാണെന്ന് തിരുവഞ്ചൂര്‍ രാധാകൃഷ്ണന്‍ എംഎല്‍എ ആരോപിച്ചു. ഡിസിസി ഓഫീസിന് നേരെ തീപന്തം എറിഞ്ഞുവെന്നും പോലീസ് ഇതുവരെ ഒരു നടപടിയും സ്വീകരിച്ചില്ലെന്നും അദ്ദേഹം കുറ്റപ്പെടുത്തി.
അതേസമയം, എകെജി സെന്ററിന് നേരെ ബോംബേറുണ്ടായതില്‍ പ്രതിഷേധിച്ച്‌ സിപിഎം സംസ്ഥാന വ്യാപകമായി പ്രതിഷേധിച്ചു. എകെജി സെന്ററിന് സമീപം തടിച്ചുകൂടിയ സിപിഎം-ഡിവൈഎഫ്‌ഐ പ്രവര്‍ത്തകര്‍ നഗരത്തില്‍ പ്രതിഷേധ പ്രകടനം നടത്തി. പത്തനംതിട്ട ഡിസിസി ഓഫീസിലേക്ക് നടന്ന പ്രകടനത്തില്‍ സിപിഎം പ്രവര്‍ത്തകരും പോലീസും തമ്മില്‍ ഉന്തും തള്ളും ഉണ്ടായി. കോഴിക്കോടും പ്രകടനം നടന്നു. ആലപ്പുഴ നഗരത്തില്‍ ഇന്ദിരാഗാന്ധിയുടെ പ്രതിമയുടെ കൈ തകര്‍ത്തു. അടൂരിലും തിരുവല്ലയിലും സിപിഎം പ്രവര്‍ത്തകര്‍ രാത്രി പ്രതിഷേധ പ്രകടനം നടത്തി.
