തിരുവനന്തപുരം : പാര്‍ട്ടി ഓഫിസുകള്‍ ആക്രമിക്കുന്നത് കോണ്‍ഗ്രസിന്റെ രീതിയല്ലെന്ന് പ്രതിപക്ഷ നേതാവ് വി.ഡി സതീശന്‍. എ.കെ.ജി സെന്റര്‍ ആരാണ് ആക്രമിച്ചതെന്ന് പോലീസ് അന്വേഷിച്ച്‌ കണ്ടുപിടിക്കട്ടെ. വിഷയങ്ങള്‍ വഴിതിരിച്ചുവിടണമെന്ന് ആഗ്രഹിക്കുന്നവരാണ് സംഭവത്തിന് പിന്നിലെന്നും സതീശന്‍ പറഞ്ഞു. നിലവിലെ വിഷയങ്ങളില്‍ നിന്ന് വ്യതിചലിച്ച്‌ വേറെ വിഷയങ്ങളിലേക്ക് പോകണമെന്ന് ആഗ്രഹിക്കുന്നവര്‍ ആരാണ്. ഞങ്ങള്‍ ഒരിക്കലും ഒരു ബോംബാക്രമണം നടത്തി നിലവിലെ വിഷയങ്ങളില്‍ നിന്ന് ഫോക്കസ് മാറ്റില്ല. വിഷയം വഴിതിരിച്ചുവിടണമെന്ന് ആഗ്രഹിക്കുന്നവരാണ് ഇതിന് പിന്നിലെന്ന് ഒരു സംശയവുമില്ല.
കോണ്‍ഗ്രസാണ് ഇതിന് പിന്നിലെന്ന് എന്ത് തെളിവിന്റെ അടിസ്ഥാനത്തിലാണ് സി.പി.എം പറയുന്നത്. കേരളത്തില്‍ കോണ്‍ഗ്രസ് ഓഫിസുകള്‍ തകര്‍ക്കാനുള്ള ബോധപൂര്‍വമായ നീക്കമാണ് നടക്കുന്നത്. ഒരു മാസത്തിനിടെ എത്ര കോണ്‍ഗ്രസ് ഓഫിസുകളാണ് കേരളത്തില്‍ തകര്‍ത്തത്. രാഹുല്‍ ഗാന്ധിയെ സ്വീകരിക്കാന്‍ കോണ്‍ഗ്രസ് നേതാക്കളെല്ലാം പോകുമ്പോള്‍, കോണ്‍ഗ്രസുകാര്‍ എ.കെ.ജി സെന്‍റിന് ബോംബെറിയുമെന്ന് സാമാന്യബുദ്ധിയുള്ള ആരും വിശ്വസിക്കില്ലെന്നും വി.ഡി സതീശന്‍ പറഞ്ഞു.
