കോട്ടയം : കെട്ടിടനമ്പര്‍ തിരുത്തി പണം തട്ടിയ സംഭവത്തില്‍ കോട്ടയം ജില്ലയിലെ അയ്മനം പഞ്ചായത്ത് സെക്രട്ടറി സോണി മാത്യുവിനെ ഇഡി വിളിച്ചു വരുത്തി മൊഴിയെടുത്തു. ഇത് സംബന്ധിച്ച രേഖകള്‍ പരിശോധനയ്ക്കായി വാങ്ങി. അയ്മനം പഞ്ചായത്തില്‍ മാത്രം കോടികളുടെ തട്ടിപ്പ് നടത്തിയിട്ടുണ്ടെന്നാണ് വിവരം. അയ്മനം പഞ്ചായത്ത് എട്ടാം വാര്‍ഡായ കുടമാളൂരിലെ സ്വകാര്യ ആശുപത്രിക്ക് ബഹുനില കെട്ടിടം പണിയാന്‍ പദ്ധതിയിട്ട് ബാങ്ക് വായ്പ തരപ്പെടുത്തുകയും പുതിയ കെട്ടിടം പണിതെന്നു കാണിക്കാന്‍ പഴയ കെട്ടിടത്തിന് പുതിയ നമ്പര്‍ നല്‍കുകയുമായിരുന്നു.
പുതിയ കെട്ടിടമാണെന്നുള്ള വ്യാജരേഖയും നിര്‍മ്മിച്ചതായാണ് അന്വേഷണത്തില്‍ കണ്ടെത്തിയത്. ബാങ്കിനെ വിശ്വസിപ്പിക്കാനായി ഈ രേഖയാണ് നല്‍കിയത്. ഇത് സംബന്ധിച്ച് ഇ.ഡി പഞ്ചായത്തില്‍ പരിശോധന നടത്തിയിരുന്നു. ഇതിന്റെ തുടര്‍ച്ചയായിട്ടാണ് പഞ്ചായത്ത് സെക്രട്ടറി സോജന്‍ മാത്യൂവിനെ ഇന്നലെ ഇ.ഡി ഒഫീസില്‍ വിളിച്ചുവരുത്തി മൊഴിയെടുത്തത്. കോഴിക്കോടും കൈക്കൂലി വാങ്ങി കെട്ടിടനമ്പര്‍ തിരുത്തി നല്‍കിയ സംഭവത്തില്‍ കോര്‍പ്പറേഷന്‍ ഉദ്യോഗസ്ഥര്‍ക്കെതിരെ അന്വേഷണം നടന്നു കൊണ്ടിരിക്കുകയാണ്. തിരുവനന്തപുരം കോര്‍പ്പറേഷനില്‍ കെട്ടിടനമ്പര്‍ തിരുത്തി ഉദ്യോഗസ്ഥര്‍ പണം തട്ടിയതായി ആരോപണം ഉയര്‍ന്നിരുന്നു.
