കോന്നി : പുനലൂർ – മൂവാറ്റുപുഴ പാതയുമായി ബന്ധിക്കുന്ന മുറിഞ്ഞകൽ – അതിരുങ്കൽ തകര്ന്നു കിടക്കുന്നത് ജനങ്ങളെ വലക്കുന്നു. മുറിഞ്ഞകല്ലിൽ നിന്നും അതിരുങ്കൽ ഭാഗത്തേക്ക് പോകുന്ന റോഡിൽ കല്ലുവിള ഭാഗത്താണ് റോഡ് കൂടുതൽ തകർച്ച നേരിടുന്നത്. പോത്ത്പാറ മേഖലയിൽ നിന്ന് പാറമടകളിൽ വന്നു പോകുന്ന അമിത ഭാരം കയറ്റിയ ടിപ്പർ ലോറികളാണ് റോഡ് തകർച്ചക്ക് കാരണമാകുന്നത്. ബി എം ആൻഡ് ബി സി നിലവാരത്തിൽ നിർമ്മിച്ച റോഡിൽ വലിയ കുഴികൾ രൂപപ്പെട്ട് ചെളിയും മണ്ണും നിറഞ്ഞ അവസ്ഥയിലാണിപ്പോൾ.
തകർന്ന റോഡിലൂടെ ഓടുന്ന വാഹനങ്ങള്ക്ക് ദിവസവും അറ്റകുറ്റപണികളാണെന്ന് ഓട്ടോ റിക്ഷ തൊഴിലാളികൾ പറയുന്നു. നിരവധി ഇരുചക്ര വാഹന യാത്രക്കാർക്ക് റോഡിലെ ഈ കുഴിയിൽ വീണ് പരിക്ക് സംഭവിച്ചിട്ടുണ്ട്. അതിരുങ്കൽ, കുളത്തുമൺ, പോത്തുപാറ, കൂടൽ, പുന്നമൂട് തുടങ്ങി വിവിധ സ്ഥലങ്ങളിൽ ജനങ്ങൾ സഞ്ചരിക്കുന്നതും ഇതുവഴി ആണ്. മുമ്പ് കോന്നി എം എൽ എ ഫണ്ടിൽ നിന്നും മുറിഞ്ഞകൽ – അതിരുങ്കൽ – പുന്നമൂട്- രാജഗിരി റോഡിന് 15 കോടി രൂപ അനുവദിച്ചിരുന്നു.